باکمال لوگوں کی لاجواب باتیں، پی آئی اے کے پائلٹس کا من پسند ناشتہ نہ ملنے پر طیارہ اڑانے سے انکار

لاہور: پی آئی اے کی لاہور سے نیویارک جانے والی پرواز کے پائلٹس نے من پسند ناشتہ نہ ملنے پرجہاز اڑانے سے انکار کر دیا جس کے باعث سیکڑوں مسافر گھنٹوں تک ایئرپورٹ پر محصور ہو گئے۔

ایکسپریس نیوز کے مطابق پی آئی اے کی پرواز پی کے 711 کو صبح 6 بج کر 15 منٹ پرلاہور سے نیو یارک کے لئے روانہ ہونا تھا تاہم فلائٹ کے کیپٹن سہیل بلوچ اور اسسٹنٹ پائلٹ نوشادعلی نے ناشتے میں ہاٹ اسنیکس نہ ملنے پر جہاز آڑانے سے انکار کردیا جس کے باعث جہاز کے 250 کے قریب مسافر گھنٹوں تک ایئر پورٹ پر محصور ہو کررہ گئے۔ پی آئی اے انتظامیہ کی جانب سے پائلٹس کی پسند ناشتہ منگوانے کے لئے ایک اسپیشل گاڑی مقامی ہوٹل بھیجی گئی جس کے بعد تقریبا 3 گھنٹے کی تاخیر سے جہاز اپنی منزل کی جانب روانہ ہوا۔

واضح رہے کہ بین الاقوامی فلائٹس کی چیکنگ فلائٹ اڑنے سے تقریبا 4 گھنٹے قبل شروع ہو جاتی ہے، جن مسافروں نے نیویارک کے لئے روانہ ہونا تھا وہ تقریبا 2 بجے سے ہی ایئرپورٹ پہنچنا شروع ہو گئے تھے لیکن انہیں جہاز کی روانگی کے لئے تقریبا7گھنٹے تک انتظار کرنا پڑا۔