غداری کیس: مشرف کے وکلا نے الزامات کی تفصیلات حاصل کرلیں

اسلام آ باد: سابق صدر جنرل(ر) پرویز مشرف کے وکلا نے خصوصی عدالت سے استغاثہ کی شکایت اور لگائے گئے الزامات کی تفصیلات حاصل کر لیں۔

ذرائع کے مطابق سابق صدر نے کیس کی تیاری کے لیے بیرسٹرعلی سیف کی سربراہی میں ایک خصوصی ڈیسک بھی قائم کردیا ہے لیکن خصوصی عدالت کا نوٹس تاحال ملزم کو موصول نہیں ہوا ہے۔ذرائع کے مطابق منگل کو پرویز مشرف کی لیگل ٹیم نے خصوصی عدالت سے استغاثہ کی طرف سے پیش کردہ مواد حاصل کیا،سابق صدر کے فارم ہائوس میں ایک خصوصی ڈسک قائم کیا گیا جس میں اس موادکا جائزہ لیا جا رہا ہے، ماہر وکلا پرمشتمل ٹیم دفاع کی طرف سے کیس تیارکررہی ہے۔

اس ضمن میں ایکسپریس نے جب خصوصی عدالت کے رجسٹرار عبدالغنی سومروسے منگل کو ان کے چیمبر میں بات کی توانھوں نے تصدیق کی کہ کورٹ افسر نے ابھی تک نوٹس پہنچانے کی رپورٹ نہیںدی ہے اس لیے رپورٹ آنے کے بعداس بارے میں کچھ کہا جا سکے گاکہ نوٹس ملزم کوموصول ہوا ہے یا نہیں۔ایک سوال کے جواب میںانھوں نے کہاکہ خصوصی عدالت مقررہ تاریخ پر بیٹھے گی اور اب کیس میں تمام احکام کورٹ کے اندرجاری کیے جائینگے۔نوٹس اور دیگر تفصیلات کے بارے میںجاننے کے لیے جب ایکسپریس نے بیرسٹرعلی سیف سے رابطہ کیا توانھوں نے کہا کہ دفاع کی تیاری مکمل ہے۔شریف الدین پیرزادہ،انور منصور خان ،خالد رانجھا، ابراہیم ستی، رانااعجاز اور وہ خود عدالت کے اندر پرویز مشرف کا دفاع کریں گے ۔ انھوںنے کہا کہ اسپیشل کورٹ کی طرف سے ابھی تک کوئی نوٹس موصول نہیں ہوا۔