سابق سپہ سالار بیماری کا بہانہ بنا کرعدالت میں پیش نہیں ہورہے، پراسیکیوٹر اکرم شیخ

اسلام آباد: غداری کیس میں پراسیکیوٹر اکرم شیخ نے کہا ہےکہ بڑے افسوس کی بات ہے کہ  سابق سپہ سالار بیماری کا بہانہ بنا کر عدالت میں پیش نہیں ہورہے۔

خصوصی عدالت میں پرویز مشرف کے خلاف غداری کیس کی سماعت کے بعد میڈیا سے بات کرتے ہوئے اکرم شیخ کا کہنا تھا کہ پرویز مشرف کو ایسی کوئی معذوری نہیں کہ عدالت میں پیش نہ ہوسکیں، میڈیکل رپورٹ کے مطابق پرویز مشرف کی دل کی دھڑکن 18 سال کے نوجوان جیسی جب کہ بلڈپریشر اسپورٹس مین کی طرح ہے۔

پرویز مشرف کے بیرون ملک علاج سے متعلق اکرم شیخ کا کہنا تھاکہ پاکستان میں تمام امراض کا علاج ہوتا ہے جب کہ کراچی کے آغا خان اسپتال اور اے ایف آئی سی میں امراض قلب کے علاج کی بہترین سہولیات موجود ہیں یہاں بیرون ملک سے بھی لوگ علاج کے لئے آتے ہیں۔