کسی نے جنگ مسلط کرنے کی کوشش کی تو بھرپور جواب دیں گے، ایرانی صدر

تہران: ایرانی صدر حسن روحانی کا کہنا ہے کہ ایران کسی ملک سے جنگ نہیں چاہتا تاہم کسی نے جنگ مسلط کرنے کی کوشش کی تو اس کا بھرپور جواب دیا جائے گا۔

دارالحکومت تہران میں یوم افواج کی مناسبت سے منعقدہ تقریب سے خطاب کرتے ہوئے ایرانی صدر نے کہا کہ ایران کے عالمی طاقتوں کے ساتھ جاری مذاکرات بات چیت کے ذریعے آگے بڑھ رہے ہیں تاہم پڑوسی ممالک کو بھی علم ہونا چاہئے کہ ایران خطے میں استحکام چاہتا ہے اور اس کیلئے کوششیں جاری رہیں گی۔ انہوں نے کہا کہ ایران نے کبھی کسی ملک کو جارحیت کا نشانہ نہیں بنایا تاہم اگر ایران کے خلاف کسی بھی جانب سے جارحیت کی کوشش کی گئی تو اس کا منہ توڑ جواب دیا جائے گا۔

ایرانی صدر نے مزید کہا کہ ایرانی مسلح افواج نے ملک کی حفاظت میں کبھی کوتاہی نہیں برتی اور ماضی میں مسلط کردہ 8 سالہ جنگ کے دوران ڈٹ کر دشمن کا مقابلہ کیا۔