بھارتی فوج کی سیالکوٹ میں ورکنگ باؤنڈری پر گولہ باری سے خاتون سمیت 2 افراد جاں بحق، متعدد زخمی

ویب ڈیسک  ہفتہ 23 اگست 2014
بھارتی فوجی کی جانب سے گزشتہ روز بھی چارواہ سیکٹر پر شہری آبادیوں اور رینجرز کی چیک پوسٹوں کو نشانہ بنایا گیا تھا۔ فوٹو: فائل

بھارتی فوجی کی جانب سے گزشتہ روز بھی چارواہ سیکٹر پر شہری آبادیوں اور رینجرز کی چیک پوسٹوں کو نشانہ بنایا گیا تھا۔ فوٹو: فائل

سیالکوٹ: بھارتی فوج نے ایک بار پھر ہٹ دھرمی کا مظاہرہ کرتے ہوئے سیالکوٹ کے چارواہ سیکٹر میں بلا اشتعال فارئرنگ اور گولہ باری کی جس کے نتیجے میں خاتون سمیت 2 افراد جاں بحق جب کہ 5 خواتین سمیت 8 افراد زخمی ہو گئے۔

ایکسپریس نیوز کے مطابق بھارتی فوج کی جانب سے جمعہ اور ہفتہ کی درمیانی شب سے پاکستانی حدود پر بلا اشتعال فائرنگ اور گولہ باری کا سلسلہ وقفے وقفے سے جاری رہا، بھارتی فوج نے سیالکوٹ میں چارواہ اور چپڑار سیکٹر کے مختلف دیہاتوں پر بلا اشتعال فائرنگ اور مارٹر گولے فائر کئے جس کے نتیجے میں خاتون سمیت 2 افراد جاں بحق جبکہ 5 خواتین سمیت 8 افراد زخمی ہو گئے۔ بھارتی گولہ باری سے سیالکوٹ کے گاؤں جاجراں گڑی کا 60 سالہ امداد حسین جاں بحق ہو گیا، گاؤں کھدرال میں مارٹر گولہ گرنے سے 35 سالہ نازیہ بی بی جاں بحق جب کہ اس کی 2 بیٹیاں زخمی ہوگئیں۔ سیالکوٹ ہی کے گاؤں بینہ سلہریاں میں بھارتی فوج کی جانب سے ماڑٹر گولہ فائر کیا گیا جس کے نتیجے میں 3 خواتین سمیت 6 افراد زخمی ہو گئے۔

چارواہ سیکٹر کے مختلف دیہاتوں میں بھارتی گولہ باری سے 7 مویشی ہلاک جب کہ درجنوں مکانات کی چھتیں بھی اڑ گئیں۔ دوسری جانب چناب رینجرز نے بھرپور جوابی کارروائی کرتے ہوئے بھارتی توپوں کو خاموش کرادیا اور انھیں پیچھے ہٹنے پر مجبور کر دیا۔

واضح رہے کہ گزشتہ چند دنوں سے بھارتی فورسز نے ایک بار پھر سرحدی خلاف ورزی کا آغاز کردیا ہے اور گزشتہ روز بھی بھارتی فوج نے چارواہ سیکٹر پر شہری آبادیوں اور رینجرز کی چیک پوسٹوں کو نشانہ بنایا تاہم چناب رینجرز نے بھرپور جوابی کارروائی کرتے ہوئے دشمن کی توپوں کو خاموش کرادیا۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔