رینجرز نے کراچی میں غیر قانونی اسلحے کے خلاف مہم کا آغاز کردیا

کراچی: سندھ رینجرز نے شہر قائد کو جرائم سے پاک کرنے کےلئے غیرقانونی اسلحے کے خلاف نئی مہم کا آغاز کردیا ہے۔

ایکسپریس نیوز کے مطابق سندھ رینجرز کے ترجمان کا کہنا ہے کہ کراچی میں غیر قانونی اسلحے کے خلاف ایک نئی مہم کا آغاز کردیا گیا ہے لہذا شہری غیر قانونی اسلحہ لے کر نہ چلیں جب کہ جن لوگوں کے پاس غیرقانونی اسلحہ موجود ہے وہ رضاکارانہ طور پر اسے قانون نافذ کرنے والے اداروں کے حوالے کردیں۔

ترجمان رینجرز کا کہنا ہے کہ غیر قانونی اسلحہ لے کر چلنا نا قابل ضمانت جرم ہے لہذا شہری ایسے جرم کا ارتکاب نہ کریں۔ انہوں نے موٹر سائیکل اور گاڑیوں پر سفر کرنے والے شہریوں کو ہدایت کی کہ وہ جہاں بھی جائیں اپنی گاڑی کے مکمل دستاویزات اپنے ہمراہ رکھیں تاکہ انہیں کسی بھی قسم کی مشکلات کا سامنا نہ کرنا پڑے۔