عالمی ادارہ صحت نے نائیجیریا کو ایبولا وائرس سے فری ملک قرار دیدیا

ابوجا: عالمی ادارہ صحت نے جان لیوا ایبولا وائرس سے متاثرہ افریقی ملک نائجیریا کو اب اس سے پاک قرار دے دیا ہے۔

غیر ملکی خبر رساں ایجنسی کے مطابق عالمی ادارہ صحت کے نائجیریا میں نمائندے نے دارالحکومت ابوجا میں پریس کانفرنس کرتے ہوئے بتایا کہ 42 روز کی کوششوں کے بعد اس جان لیوا وائرس کو نائجیریا میں فی الحال شکست دی جاچکی ہے اور اس دوران وائرس سے متاثرہ کوئی نیا کیس سامنے نہیں آیا تاہم جب تک اس وائرس کو باقی متاثرہ ممالک سے پوری طرح ختم نہیں کیا جاتا وائرس کے دوبارہ پھیلنے کے امکانات رہیں گے۔ انہوں نے کہا کہ نائجیریا میں ایبولا کا خاتمہ ایک بڑی کامیابی ہے اور اس سے ظاہر ہوتا ہے کہ ہم اس وائرس پر ہمیشہ کے لئے قابو پاسکتے ہیں۔

واضح رہے کہ افریقی ممالک کے بعد دنیا کے دیگر ممالک میں پھیلنے والے اس خطرناک وائرس سے رواں سال اب تک 4 ہزار 500 سے زائد افراد لقمہ اجل بن چکے ہیں اور 10 ہزار سے زائد افراد اس سے متاثر ہوئے جن میں بڑی تعداد گیانا، لائبیریا اور سیرا لیون کے شہریوں کی ہے۔