عالیہ بھٹ کرکٹر دھونی کی زندگی پر مبنی فلم میں ان کی اہلیہ ساکشی بنیں گی

شوبز ڈیسک  منگل 16 دسمبر 2014
 ایم ایس دھونی کی زندگی پر بننے والی اس فلم میں بھارتی کرکٹ ٹیم کے کھلاڑیوں کا کردار نبھانے کے لیے بہت سے اے لسٹ اداکاروں کو کاسٹ کیا جا رہا ہے۔ فوٹو: فائل

ایم ایس دھونی کی زندگی پر بننے والی اس فلم میں بھارتی کرکٹ ٹیم کے کھلاڑیوں کا کردار نبھانے کے لیے بہت سے اے لسٹ اداکاروں کو کاسٹ کیا جا رہا ہے۔ فوٹو: فائل

ممبئ: بھارت کے مشہور فلمساز مہیش بھٹ کی چھوٹی بیٹی اداکارہ عالیہ بھٹ اب بھارتی کرکٹ ٹیم کے کپتان ایم ایس دھونی کی زندگی پر بننے والی فلم میں ان کی اہلیہ ساکشی سنگھ دھونی کا کردار ادا کریں گی۔

شوبز کی تازہ ترین اطلاعات کے مطابق دھونی کی بائیو پک میں ایم ایس دھونی کا کردار نبھانے والے اداکار سوشانت سنگھ راجپوت کو شاید اب اپنی ہیروئن مل گئی ہے اور وہ نئی ابھرتی اداکارہ اور سال 2014ء میں کامیاب ترین فلمیں دینے والی عالیہ بھٹ ہیں۔ اس سلسلے میں عالیہ بھٹ کی ڈائریکٹر نیرج پانڈے سے بھی ملاقات ہوئی ہے جس میں اداکارہ کو فلم میں ان کے کردار ساکشی کے لیے مضمون دیا گیا ہے۔ بتایا جا رہا ہے کہ ایم ایس دھونی کی زندگی پر بننے والی اس فلم میں بھارتی کرکٹ ٹیم کے کھلاڑیوں کا کردار نبھانے کے لیے بہت سے اے لسٹ اداکاروں کو کاسٹ کیا جا رہا ہے۔

ایم ایس دھونی کا کردار ادا کرنے کے لیے منتخب کیے گئے اداکار سوشانت سنگھ راجپوت کے ساتھ اب یہ بھی سننے میں آیا ہے کہ تیلگو فلموں کے سپر اسٹار رام چرن تیج اس فلم میں کرکٹر سریش رائنا کا کردار ادا کریں گے۔ اسی طرح جان ابراہم فاسٹ باؤلر ایشانت شرما کا کردار ادا کریں گے جب کہ پاکستانی اداکار فواد خان فلم میں کرکٹر ویرات کوہلی بنیں گے۔ ’’ بگ باس 8 ‘‘ مقابلے میں حصہ لینے والے گوتم گلاٹی فاسٹ باؤلر ظہیر خان بنیں گے اور اداکار آفتاب شیوڈسانی جوگندر شرما کا کردار نبھائیں گے۔

اسی طرح فلم میں کرکٹ کھلاڑیوں کے کرداروں سے علاوہ دیگر کرداروں کے لیے بھی بالی ووڈ ٹاؤن سے بڑے اداکاروں کا انتخاب کیا جا رہا ہے۔ فلم میں اداکار عرفان خان گورو ناتھ بنیں گے اور یہ بھی سننے میں آیا ہے کہ اداکار ستیش کاؤشک ایس سری نواسن کا کردار ادا کریں گے۔ کہا جا رہا ہے کہ یہ سال 2015ء کی ایک بڑی فلم ہوگی جس میں بہت سارے اداکار ایک ساتھ نظر آئیں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔