گوجرانوالہ شہر ایس ایچ او کے بیٹے کی شادی پر ہوائی فائرنگ سے گونج اٹھا

گوجرانوالہ: ایس ایچ او کے بیٹے کی شادی کے موقع پر شہر گولیوں کی تڑتڑاہٹ سے گونج اٹھا جس کے بعد وزیراعلیٰ پنجاب نے واقعے کا نوٹس لیتے ہوئے ملوث افراد کی گرفتاری کا حکم دے دیا۔

ایکسپریس نیوز کے مطابق کے گوجرانوالہ کے علاقے اروب میں ایس ایچ او طاہر فاروق چیمہ کے بیٹے کی شادی کے موقع پر لیگی کارکنوں نے قانون کی دھجیاں اڑاتے ہوئے بندوقوں کا منہ کھول دیا اور ایس ایچ او کے بیٹے علی چیمہ اور مسلم لیگ (ن) کے ضلعی عہدیدار تماں بٹ سمیت دیگر لیگی کارکنوں نے ہوائی فائرنگ کا آزادانہ مظاہرہ کیا جس سے پورا علاقہ گولیوں کی تڑتڑاہٹ سے گونج اٹھا جبکہ ایس ایچ او نے بیٹے کی شادی میں فائرنگ کی تردید کردی ہے۔

دوسری جانب وزیراعلیٰ پنجاب شہبازشریف نے فائرنگ کو نوٹس لیتے ہوئے پولیس حکام کو اس میں ملوث افراد کی گرفتاری کا حکم دیا ہے جبکہ سی پی او گوجرانوالہ کا کہنا ہے کہ ایس ایچ او کے بیٹے کی شادی کچھ روز قبل ہوئی تھی اور اس واقعے کا اس سے کوئی تعلق نہیں تاہم ہوائی فائرنگ میں ملوث افراد کے خلاف کارروائی ہوگی۔