امریکا میں باکسرعامر خان کو دوران ڈرائیونگ سیلفی لینے پر مقدمے کا سامنا

کیلیفورنیا: سیلفی لینے کا شوق تیزی سے مقبول ہورہا ہے جس کے لیے ہر شخص موبائل ہاتھ میں تھامے ہر جگہ سیلفی لینے میں مگن ہوجاتا ہے لیکن کبھی کبھی سیلفی بھاری بھی پڑ جاتی ہیں اور ایسا ہی کچھ ہوا برطانوی نژاد پاکستانی باکسر عامر خان کے ساتھ جنہیں دوران ڈرائیونگ سیلفی لینے پر مقدمے کا سامنا کرنا پڑ گیا۔

باکسر عامر خان ان دنوں باکسنگ مقابلے کے سلسلے میں امریکا میں موجود ہیں جہاں وہ سیر سپاٹے کرنے میں بھی مصروف ہیں اور اس سیر و تفریح کے دوران ہی عامر خان نے کیلی فورنیا میں ڈرائیونگ کرتے ہوئے سیلفی فوٹو لی اور اسے سماجی رابطے کی ویب سائٹ پر پوسٹ کردیا جب کہ اس دوران وہ سڑک پرنصب سکیورٹی کیمروں کی آنکھ سے نہ بچ سکے اور ان کیمروں نے عامر خان کی اس قانون کی خلاف ورزی کو نوٹ کرلیا جس کے بعد ان پر مقدمہ درج کرلیا گیا ہے۔ عامر خان کے ترجمان نے اس واقعے پر کسی قسم کے تبصرے سے انکار کردیا ہے۔

کیلیفورنیا قانون کے مطابق ڈرائیونگ کے دوران فون کا استعمال ایک سنگین جرم ہے جس پر بھاری جرمانہ، لائیسینس پر پوائنٹس اور یہاں تک کہ ڈرائیونگ پر پابندی بھی عائد کی جاسکتی ہے۔

واضح رہے کہ عامر خان اس سے قبل بھی ڈرائیونگ کے دوران تصاویر اور سیلفی پوسٹ کرتے رہے ہیں جو اکثر وبیشتر سماجی رابطوں کی ویب سائٹس پر سامنے آتی رہتی ہیں۔ 8 سال قبل عامر خان کی کار سے ایک شخص بھی ٹکرا کر ہلاک ہوچکا ہے۔