دہشت گرد کسی بھی وقت سندھ اسمبلی کو نشانہ بناسکتے ہيں، آغا سراج درانی  

 کراچی: اسپیکر سندھ اسمبلی آغا سراج درانی نے رولنگ دی ہے کہ دہشت گرد کسی بھی وقت سندھ اسمبلی کو نقصان پہنچا سکتے ہيں۔ 

سندھ اسمبلی کے اجلاس کے دوران اسپیکر آغا سراج درانی نے رولنگ دی کہ سندھ اسمبلی کو سیکیورٹی کے شدید خدشات لاحق ہیں، دہشت گرد کسی بھی وقت سندھ اسمبلی کو نقصان پہنچا سکتے ہيں ۔ انہوں نے ڈی جی رینجرز اور آئی جی سندھ کو خط لکھا ہے جس میں انہوں نے کہا ہے کہ اسمبلی آنے والے راستے محفوظ نہیں۔ اس لئے سیکیورٹی کو مزید سخت کیا جائے۔

اسپیکر کی رولنگ پر قائدحزب اختلاف شہریار مہر نے کہا کہ وہ اسمبلی اور راستوں کی سیکیورٹی کی بات کررہے ہیں، ہمیں آئی جی سندھ  بات کرنے کے لیے بھی دستیاب نہیں، وہ قائد حزب اختلاف ہیں لیکن اس کے باوجود انہیں سیکیورٹی فراہم نہیں کی گئی۔

اجلاس کے دوران خیبر پختون خوا میں طوفانی بارشوں سے جاں بحق ہونے والے افراد اور نواب زادہ طلال اکبر بگٹی کے انتقال پر بھی دعائے مغفرت کی۔