ڈیرہ غازی خان میں اسکول پر حملہ، فائرنگ سے سیکیورٹی گارڈ جاں بحق

ڈیرہ غازی خان: ملتان روڈ پر گورنمنٹ ہائی اسکول میں حملہ آوروں کی فائرنگ سے سیکیورٹی گارڈ جاں بحق ہوگیا۔

ایکسپریس نیوز کے مطابق ڈیرہ غازی خان میں ملتان روڈ پر واقع گورنمنٹ ہائی اسکول سروروالی کے مرکزی دروازے پر 2 نامعلوم افراد نے فائرنگ کردی جس کے نتیجے میں سیکیورٹی گارڈ غلام عباس زخمی ہو گیا۔ امدادی ٹیموں کے اہلکاروں نے غلام عباس کو فوری طور پر قریبی اسپتال منتقل کیا جہاں وہ زخموں کی تاب نہ لاتے ہوئے دم توڑ گیا۔ واقعہ کی اطلاع ملتے ہی پولیس کی بھاری نفری اسکول پہنچ گئی تاہم حملہ آور فرار ہونے میں کامیاب ہو گئے۔