پاکستان نے پہلے ٹی ٹوئنٹی میچ میں زمبابوے کو شکست دیدی

لاہور: پاکستان نے اوپنر احمد شہزاد اور مختار احمد کی شاندار بلے بازی کی بدولت پہلے ٹی ٹوئنٹی میچ میں زمبابوے کو شکست دیدی۔

قذافی اسٹیڈیم لاہور میں کھیلے گئے میچ میں زمبابوے کے کپتان چگمبورا نے ٹاس جیت کر بیٹنگ کا فیصلہ کیا اور مقررہ 20 اوورزمیں 6 وکٹوں کے نقصان پر 172 رنز بنائے، زمبابوے کی جانب سے چگمبورا نے 54 جب کہ مساکیڈزا نے 43 رنز اسکور کئے۔ محمد سمیع نے شاندار کم بیک کرتے ہوئے 3 کھلاڑیوں کو پویلین کی راہ دکھائی جب کہ وہاب ریاض نے 2 وکٹیں حاصل کیں اور شعیب ملک کے حصے میں ایک وکٹ آئی۔

پاکستان کی جانب سے احمد شہزاد اورمختار احمد میدان میں اترے جنہوں نے شاندار کھیل کا مظاہرہ کرتے ہوئے 142 رنز کی پارٹنر شپ قائم کی، احمد شہزاد 55  اورمختار احمد 83 رنز بناکر آؤٹ ہوئے جب کہ محمد حفیظ 12 عمر اکمل 4 اور شعیب ملک 7 رنز بناکر پویلین لوٹ گئے۔

قذافی اسٹیڈیم  شائقین کرکٹ سے کھچا کھچ بھرا ہوا تھا جب کہ تماشائیوں نے مہمان زمبابوین ٹیم کو پلے کارڈز اٹھا کر خوش آمدید کہا، تماشائیوں نے اپنے چہرے پر پاکستان اور زمبابوے کے پرچم پینٹ کرار کھے  تھے جب کہ  اس دوران  گراؤنڈ میں جشن کا سماں رہا۔

ملک میں 6 سالہ طویل انتظار کے بعد عالمی کرکٹ کی بحالی ہوئی تو صدر مملکت ممنون حسین بھی قذافی اسٹیڈیم پہنچے اور انہوں نے دونوں ٹیموں کے کھلاڑیوں سے مصافحہ کیا۔ دوسری جانب سیکیورٹی صورتحال کے باعث قذافی اسٹیڈیم کے باہر اور اطراف انتہائی سخت انتظامات کئے گئے تھے جس کے لئے پولیس، ایلیٹ فورس اور رینجرز کے اہلکار تعینات تھے۔

دوسری جانب ٹی ٹوئںٹی کپتان شاہد آفریدی نے جیت کا کریڈیٹ اوپنرز کو دیتے ہوئے کہا کہ احمد شہزاد اور مختار احمد کی بیٹنگ کی بدولت ہماری جیت ممکن ہوئی جب کہ زمبابوے نے بھی اچھے کھیل کا مظاہرہ کیا۔ انہوں نے کہا کہ پاکستانی تماشائیوں نے ثابت کردیا کہ وہ کرکٹ سے بے پناہ محبت کرتے ہیں جب کہ ملک میں کرکٹ گراونڈ دوبارہ آباد ہورہے ہیں اس لئے دیگر ٹیموں کو بھی یہاں کا رخ کرناچاہیے۔

زمبابوے کپتان چگمبورا نے کہا کہ وکٹ بیٹنگ کے لئے سازگار تھی جب کہ تماشائیوں نے بھی ہمیں بھرپور سپورٹ کیا۔

ادھر قومی ٹیم کی جیت پر وزیراعظم نوازشریف، وزیراعلیٰ پنجاب اور وزیراعلیٰ خیبرپختونخوا نے مبارک باد دی ہے جب کہ وزیراعظم کا کہنا تھا کہ پاکستانی ٹیم آنے والے میچز میں بھی ایسی کارکردگی جاری رکھے۔

واضح رہے کہ پاکستان اور زمبابوے کے درمیان 2 ٹی ٹوئنٹی اور 3 ایک روزہ میچز پر مشتمل سیریز کھیلی جارہی ہے۔