دستخط آپ کی شخصیت کو ظاہرکرتے ہیں

لندن: ماہرین کے مطابق کسی کے دستخط اس کی شخصیت کے بارے میں بہت کچھ بیان کرتے ہیں کیونکہ دستخط کی معمولی تفصیلات نہ صرف معنی خیز ہوتی ہیں بلکہ کسی بھی شخص کے کیریئر پر بھی اثر انداز ہوسکتی ہیں۔

اگر فیس بک کے بانی مارک زکربرگ کے دستخط کو دیکھاجائے تو انکشاف ہوگا کہ وہ اپنے نام کے پہلے چند حروف اور وہ بھی بڑے الفاظ ( کیپٹل ورڈز) میں ہیں۔ تحریر کے ماہرین کے مطابق اس سے ظاہر ہوتا ہےکہ وہ اعتماد سے بھرپور، بلند حوصلے والے ہیں اور اپنی ذات میں سمٹے ہوئے ہیں۔

دنیا کے نامور موجد اور ایپل کمپنی کے بانی اسٹیو جابز کا دستخط اوپر کی جانب اٹھتا دکھائی دیتا ہے اور اس کے کنارے نوکدار ہیں جو ثابت کرتے ہیں کہ وہ مستقبل میں آگے کی جانب دیکھتے ہیں ان میں صبر کم ہے اور طبیعت میں جارحیت ہے۔

مائیکروسوفٹ کے بانی بل گیٹس کے دستخط پڑھنے میں آسان اور متوازن ہیں جس سے ثابت ہوتا ہے کہ وہ انکساری رکھتے ہیں لیکن بالکل راست باز ہیں ۔ دستخط میں پہلا بڑا حرف ان کی پراعتمادی کو ظاہر کرتا ہے۔

دستخطوں میں چھپے راز:

ماہرین کے مطابق تیزی سے لکھے جانے والے دستخط جس میں الفاظ پہچانے نہ جاتے ہوں وہ دماغی پھرتی اور ذہنی صلاحیت کو ظاہر کرتے ہیں جب کہ پڑھا جانے والا واضح حروف کا دستخط بتاتا ہے کہ وہ شخص کھلا اور راست گو ہے۔ کسی دستخط کے نیچے لکیر کھینچی ہو تو وہ شخص خود کو اہمیت دیتا ہے جب کہ دستخط انڈرلائن نہ ہو تو وہ شخص لوگوں میں اپنی کامیابیاں کا ذکر کرنا پسند کرتا ہے اس کے علاوہ دستخط میں نوکدار لکیریں بے صبری اور غصے کو ظاہر کرتی ہیں۔

دستخط اگربتدریج اوپرکی جانب جارہا ہو تو عزم اور مستقبل کی جانب نظر رکھنے کو ظاہرکرتا ہے جب کہ ڈھلان کی طرح نیچے جاتا دستخط مایوسی، ملاقات سے گریزاں اور خطرات مول نہ لینے کی علامت ہے جب کہ دستخط پر فل اسٹاپ کاروباری صلاحیتوں کی نشاندہی کرتا ہے۔