مصرمیں لگا دنیا کا سب سے بڑا افطار دسترخوان

قاہرہ: مصر کے شہر اسکندریہ میں روزے داروں کے لیے دنیا کا طویل ترین افطار دستر خوان لگایا گیا جس پر10 ہزار افراد کے افطار کرنے کی گنجائش تھی۔

غیر ملکی خبر رساں ادارے کے مطابق مصر کے شہر اسکندریہ میں 800  طلبا کی جانب سے رضاکارانہ طور پر دنیا کا سب سے بڑا افطار دستر خوان لگایا گیا، دستر خوان کے لئے افطار کا سامان مصر کی فوج نے مہیا کیا جب کہ مقامی تاجروں اور شہریوں نے بھی اس کی تیاری میں بھرپورطریقے سے عطیات دیئے تھے۔

دنیا کے طویل ترین دسترخوان پربیک وقت 10 ہزارافراد کے ایک ساتھ افطار کی گنجائش تھی، یہ دستر خوان ایک خاص و عام شخص کے لئے بلا معاوضہ کھلا تھا تاہم اس دستر خوان پر بیک وقت 7 ہزار روزے داروں نے ہی افطار کیا۔