عمران خان ایم کیوایم کی فکر کے بجائے اپنی جماعت کے اختلافات پرتوجہ دیں، رابطہ کمیٹی

 کراچی: عمران خان کے بی بی سی کے خلاف عدالت جانے کے بیان پر متحدہ قومی مومنٹ کی رابطہ کمیٹی نے ا پنے درعمل میں کہا ہے کہ عمران خان ایم کیو ایم کی فکر میں دبلا ہونے کے بجائے اپنی جماعت کے اندرونی اختلافات پر توجہ دیں۔

رابطہ کمیٹی کی جانب سے جاری بیان میں کہا گیا ہے کہ بی بی سی کے خلاف عدالت جانا ہے یا نہیں یہ ایم کیوایم کا مسئلہ ہے، عمران خان اس فکر میں دبلے نہ ہوں بلکہ اپنی پارٹی کے اندرونی اختلافات پر توجہ دیں، پوری قوم جانتی ہے کہ الطاف حسین پر الزام لگانے والے عمران خان کس کی فنڈنگ پر سیاست کر رہے ہیں۔

رابطہ کمیٹی کے مطابق سندھ کے شہری علاقوں کی نمائندہ جماعت کے قائد الطاف حسین پر الزام تراشی ناقابل برداشت ہے، عمران خان کی کھیل کے میدان سے سیاست تک پوری زندگی الزام تراشی سے عبارت ہے،عمران خان کو اہالیانِ کرا چی صرف پیسہ جمع کرنے اور الیکشن لڑنے کے وقت یاد آتے ہیں، کیا عمران خان نے کبھی کراچی کے شہریوں کے مسائل جاننے اور ان کے زخموں پر نمک رکھنے کی کوشش کی ہے۔