واٹس ایپ انڈرائڈ صارفین کیلئے جلد اردو سروس متعارف کروا رہا ہے

ویب ڈیسک  پير 27 جولائی 2015
واٹس ایپ نے کئی زبانوں میں اپنی سروس پیش کرنے کے بعد اب اردو ورژن لانے کا فیصلہ کیا ہے، فوٹوواٹس ایپ

واٹس ایپ نے کئی زبانوں میں اپنی سروس پیش کرنے کے بعد اب اردو ورژن لانے کا فیصلہ کیا ہے، فوٹوواٹس ایپ

 کراچی: انڈرائڈ صارفین کے لیے 5 جدید فیچرز متعارف کرانے کے بعد ایک اور قدم آگے بڑھتے ہوئے واٹس ایپ نے اردو سروس متعارف کرانے کا فیصلہ کیا ہے جس سے ان لاکھوں صارفین کو رابطے میں مزید سہولت ملے گی جو صرف اردو ہی جانتے ہیں۔

واٹس ایپ کے ٹرانسلیشن ایڈمنسٹریٹر احسن سعید نے ایکسپریس ٹریبیون سے بات کرتے ہوئے کہا کہ اردو ترجمے کے عمل کا آغاز 3 سال قبل کردیا گیا تھا تاہم حتمی عمل کو مکمل کرنے کے لئے 3 ماہ کا عرصہ لگا جب کہ اس پورے عمل کورضا کارانہ خدمات پیش کرنے والے ماہرین کی مدد سے پورا کیا گیا ہے۔ انہوں نے کہا کہ 3 ماہ کے عرصے کے دوران 753 اسٹرنگز اور 2089 ماڈریٹ اسٹرنگز کا ترجمہ کیا گیا اور اس طرح اردو کو ان 18 زبانوں میں  شامل کردیا گیا ہے جن کا واٹس ایپ اب تک مکمل طور پر ترجمہ کر چکا ہے۔

واٹس ایپ کے اینڈرائڈ ورژن میں 5 نئے فیچر متعارف

احسن سعید کا کہنا تھا کہ اگرچہ اب بھی لوگ اردو میں رابطہ کرتے ہیں جس کے لیے وہ اردو کی بورڈ کا استعمال کرتے ہیں تاہم اس نئی کوشش سے یوزرز کے لیے واٹس ایپ اردو میں دستیاب ہوگا۔ ان کا کہنا تھا کہ  پاکستان میں رہنے والے یوزرز کا ایک بڑاحصہ موبائل انٹرنیٹ پر اردو کو فوقیت دیتا ہے اس لیے یہ ان کی ضرورت تھی  جب کہ یہ ان لوگوں کے لیے بھی اہم ہے جو خود کو قومی زبان سے جوڑے رکھنا چاہتے ہیں۔

واٹس ایپ کے مطابق اس ورژن کا سب سے اہم اور دلچسپ پہلو یہ ہے کہ اس پورے پراجیکٹ  کے دوران کام کرنے والی ٹیم نے اپنی بھرپور توانائیاں رضاکارانہ طور پر اور اردو سے محبت میں انجام دیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔