جرمن فضائی کمپنی لفتھانزا کی تجارتی مال برداری کیلئے ڈرونز استعمال کرنے کی تیاریاں

ویب ڈیسک  پير 3 اگست 2015
لفتھانزا کی سالانہ آمدنی 30 ارب یورو سے بھی زیادہ ہے فوٹو: فائل

لفتھانزا کی سالانہ آمدنی 30 ارب یورو سے بھی زیادہ ہے فوٹو: فائل

فرینکفرٹ: جرمنی کی قومی اور دنیا کی سب سے بڑی فضائی کمپنی لفتھانزا نے تجارتی مال برداری کے لیے ہوائی جہازوں کے بجائے ڈرونز استعمال کرنے کی تیاریاں شروع کردی ہیں۔

جرمن ویب سائیٹ کے مطابق فضائی کمپنی لفتھانزا نے جدید دور کے تقاضوں کو مدنظر رکھتے ہوئے مال برداری کرنے والے نجی ڈرونز استعمال کرنے کے لئے اپنے ملازمین کی تربیت شروع کردی ہے، اس کے علاوہ ان ڈرونز کی تکنیکی دیکھ بھال کی مشقیں بھی زور و شور سے جاری ہیں۔

جرمنی سمیت کئی یورپی ملکوں میں ہوائی اڈوں کی فضاؤں میں ڈرون طیارے اڑانے کی ممانعت ہے۔ اس کے علاوہ ایک قانون یہ بھی ہے کہ کوئی بھی ڈرون طیارہ ہر وقت اسے اڑانے والے پائلٹ کی نظروں میں رہنا چاہیے۔ ان قوانین کی وجہ سے کارگو کمپنیوں کے لئے سامان کی ترسیل کے لیے ڈرون طیاروں کا استعمال ناممکن ہے، اس کے باوجود لفتھانزا کے چیف ایگزیکٹو کارسٹن شپوہر کو توقع ہے کہ مستقبل قریب میں تجارتی مال برداری کے لیے نجی ڈرونز کا استعمال بہت ترویج پائے گا اور فضائی کمپنیوں کے وہ مسائل بھی کسی حد تک کم ہو جائیں گے جو مال بردار پروازوں کے پائلٹوں کی ہڑتالوں کے باعث پیدا ہوتے ہیں۔

واضح رہے کہ لفتھانزا کی کمرشل پروازوں میں سفر کرنے والے مسافروں کی سالانہ تعداد لاکھوں میں ہے اور اس ادارے کی سالانہ آمدنی 30 ارب یورو سے بھی زیادہ ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔