لاطینی امریکی ملک ڈومینکا میں سمندری طوفان سے 20 افراد ہلاک

سانتو ڈومینکا: کیریبین جزائر کے ملک ڈومینکن ریپبلک میں سمندری طوفان کے نتیجے میں 20 افراد ہلاک اور درجنوں لاپتا ہوگئے۔

غیر ملکی خبر رساں ادارے کے مطابق لاطینی امریکی ملک ڈومینکن ریپبلک میں سمندری طوفان اریکا نے تباہی مچادی جس کے نتیجے میں اب تک 20 افراد ہلاک اور درجنوں لاپتا ہوگئے ہیں جب کہ طوفان نے اب امریکی ریاست فلوریڈا کے ساحلوں کا رخ کرلیا ہے جہاں ایمرجنسی نافذ کردی گئی ہے۔

حکام کے مطابق سمندری طوفان اریکا سے املاک کو شدید نقصان پہنچا ہے تاہم علاقے میں بڑے پیمانے پر امدادی کارروائیاں جاری ہیں۔ دوسری جانب ڈومینکن وزیراعظم نے کہا ہے کہ طوفان اریکا کی وجہ سے ملک میں بڑی تباہی ہوئی ہے جس کی وجہ سے ہزاروں گھر، سڑکیں اور پل تباہ ہوگئے ہیں جب کہ تباہی کے باعث ملک 20 سال پیچھے چلا گیا ہے۔