اپنے اطراف کے لحاظ سے رنگ بدلنے والا روبوٹ گِرگِٹ تیار

ویب ڈیسک  پير 8 فروری 2016

بیجنگ: چینی انجینیئروں نے تھری ڈی پرنٹر کی مدد سے ایسا مشینی روبوٹ گرگٹ بنایا ہے جو فوری طور اپنے اطراف کے لحاظ سے رنگ بدل سکتا ہے۔

ووہان یونیورسٹی کے سائنسدان گوپنگ وینگ اور ان کے ساتھیوں کی مشترکہ کوشش سے تیار کردہ گِرگِٹ کے اس ماڈل میں پلازمونک ڈسپلے نصب ہے جو نینو اسکیل اسٹرکچر اور برقی فیلڈ کے لحاظ سے رنگ بدلتا ہے۔ اس کے لیے پہلے نفیس شیشے کی پرت پر بہت باریک سوراخ کیے گئے ہیں جن میں سونے کے ذرات بھرے گئے ہیں اس کے بعد ان پر الیکٹرولائٹ مواد بھرا گیا ہے۔

 

جیسے ہی روشنی سونے کے ذرات تک جاتی ہے وہ الیکٹرون کی موجیں پیدا کرتی ہیں جنہیں پلازمونز کہا جاتا ہےاور وہ شیشے پر اسی لحاظ سے روشنی پھینکتی ہے اور روبوٹ گِرگِٹ اطراف کے لحاظ سے رنگ بدلتا دکھائی دیتا ہے۔ اس کے بعد سائنسدانوں نے گِرگِٹ کو مختلف ماحول اور رنگوں کی شیٹ کے ساتھ آزمایا لیکن اطراف کی روشنی پہچاننے کے لیے اس میں بہت اعلیٰ سینسر لگائے گئے ہیں جو اسی شدت کے لحاظ سے روبوٹ کا رنگ بدل دیتےہیں۔

فی الحال یہ روبوٹ تین طرح کے بنیادی رنگ ہی بدل سکتا ہے جن میں سرخ، سبز اور نیلا شامل ہیں لیکن وینگ کے مطابق مزید کوشش سے یہ ہرطرح کے رنگ بدلنے کے قابل ہوجائے گا۔ اس سارے نظام کو بہتر بناکر ایک زبردست کیموفلاج سسٹم بنایا جاسکتا ہے جسے پولیس اور افواج استعمال کرسکیں گے اور انہیں سیکیورٹی کے لیے بھی آزمایا جاسکتا ہے۔

عسکری ادارے اس کے ذریعے ایسے فوجی لباس بھی تیار کرسکیں گے جو سپاہی کے لباس کو اطراف کے لحاظ سے رنگ دے کر انہیں اپنے مشن میں آسانی فراہم کریں گے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔