پاکستانی ٹیم کومکمل سیکیورٹی دینے کی بھارتی یقین دہانی

اسپورٹس ڈیسک  جمعرات 11 فروری 2016
باہمی سیریزیکسرمختلف موضوع ہے،ورلڈکپ میں کئی ٹیمیں شریک ہوتی ہیں فوٹو:اےایف پی/فائل

باہمی سیریزیکسرمختلف موضوع ہے،ورلڈکپ میں کئی ٹیمیں شریک ہوتی ہیں فوٹو:اےایف پی/فائل

نئی دہلی:  بھارتی کرکٹ بورڈ نے ورلڈ ٹوئنٹی 20 میں پاکستانی ٹیم کو مکمل سیکیورٹی فراہم کرنے کی یقین دہانی کرادی۔

تفصیلات کے مطابق چیئرمین پی سی بی شہریار خان نے حال ہی میں کہا تھا کہ آئی سی سی میٹنگز کے دوران انھوں نے پاکستان کے ورلڈ ٹوئنٹی 20 میچز نیوٹرل وینیو پر منعقدکرنے کی تجویز دی کیونکہ حکومت ٹیم بھارت بھیجنے کی اجازت دینے سے انکار کرسکتی ہے۔ اس پر بی سی سی آئی کے سیکریٹری انوراگ ٹھاکر نے کہاکہ ہم انتہائی منظم انداز میں ایونٹ کا انعقاد کرنے والے ہیں، شریک ٹیموں کی مکمل حفاظت کی جائے گی، اس سے قبل بھی ہم ورلڈ کپ اور انٹرنیشنل میچز کی میزبانی کرچکے ہیں، میں نہیں سمجھتا کہ کسی ٹیم کو یہاں غیرمحفوظ سمجھنا چاہیے۔

انوراگ نے واضح کیا کہ پاکستان کوہی یہ فیصلہ کرنا ہے کہ اسے بھارت میں کھیلنا ہے یا نہیں، انھوں نے کہا کہ باہمی سیریز یکسر مختلف موضوع ہے، ورلڈ کپ میں دنیا کے مختلف حصوں سے ٹیمیں شریک ہوتی ہیں، اس بار بھی 16 ٹیموں میں پاکستان بھی شامل اور دیگر سائیڈز کی طرح بھارتی حکومت اسے بھی مکمل سیکیورٹی فراہم کرے گی۔

انھوں نے کہا کہ میں سمجھتا ہوں کہ اس ایونٹ کیلیے کوالیفائی کرنے والی تمام ٹیموں کو بھارت آنا اور میگا ایونٹ میں شریک ہونا چاہیے، البتہ اگر کسی ملک کے کچھ اپنے ایشوز ہیں تو پھر اسے خود ہی اس بارے میں فیصلہ کرنا ہے۔یاد رہے کہ اس سے قبل شہریار خان ورلڈ ٹوئنٹی 20 کے بائیکاٹ کا عندیہ بھی دے چکے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔