آرمی چیف جنرل راحیل شریف کا قطری قیادت سے افغان مصالحتی عمل پر تبادلہ خیال

پاک فوج کے سربراہ جنرل راحیل شریف کی قطر کے اعلیٰ عسکری وسول حکام سے الگ الگ ملاقاتیں، آئی ایس پی آر

ویب ڈیسک پير 22 فروری 2016

دوحا: آرمی چیف جنرل راحیل شریف نے قطر کے امیرشیخ تمیم بن حماد سمیت اعلیٰ حکام سے ملاقاتیں کیں جس میں خطے کی سیکیورٹی صورتحال سمیت دو طرفہ دفاعی تعاون کے امور پر بات چیت کی گئی۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل راحیل شریف نے قطر کے امیرشیخ تمیم بن حماد سے ملاقات کی جس میں خطے کی سیکیورٹی صورتحال، دوطرفہ دفاعی تعاون کے امور پر بات چیت کی گئی۔ ترجمان پاک فوج کے مطابق آرمی چیف نے قطر کے وزیراعظم، وزیردفاع، وزیرداخلہ اوربری افواج کے سربراہان سے بھی علیحدہ علیحدہ ملاقاتیں کی جس میں دونوں ملکوں کے درمیان دفاعی تعاون بڑھانے پر اتفاق کیا گیا جب کہ افغانستان میں قطرآفس کے ذریعے مصالحتی عمل پرتفصیلی تبادلہ خیال بھی کیا۔

ڈی جی آئی ایس پی آر لیفٹننٹ جنرل عاصم باجوہ کا کہنا تھا کہ قطری قیادت نے قطر کی اعلیٰ قیادت نے خطے میں استحکام کیلیے پاکستان کے کردار کو سراہتے ہوئے کہا کہ دہشت گردی کے خاتمے خطے میں قیام امن کیلیے پاک فوج کی کاوشیں قابل تحسین ہیں۔ ترجمان نے کہا کہ قطری قیادت کا کہنا تھا کہ پاکستان اور قطر کے درمیان مضبوط برادرانہ تعلقات ہیں جب کہ دونوں ملکوں کے تعلقات اسٹرٹیجک تعاون میں تبدیل ہورہے ہیں۔

واضح رہے چیف آف آرمی اسٹاف جنرل راحیل شریف ایک روزہ سرکاری دورے پر دوحا میں موجود ہیں۔