ملک کی سیاست میں کرپشن کے ناسور کو دکھانا فلم ’’مالک‘‘ کا جرم بن گیا

کراچی: پاکستانی فلم ’مالک‘ میں ملکی سیاست میں پائے جانے والے کرپشن کے ناسور کو معاشرے کے سامنے پیش کرنے پر پابندی لگا دی گئی۔

فلمیں اور ڈرامے معاشرے کے عکاس ہوتے ہیں اور یہی کچھ پاکستان کی نئی فلم ’مالک ‘ میں دکھانے کی کوشش کی گئی، فلم میں  سیاست میں کرپشن اور بدعنوانی کا پردہ فاش کیا گیا لیکن ملکی سیاست میں کرپشن کے ناسورکو معاشرے کے سامنے پیش کرنے پر اس فلم پر پابندی لگا دی گئی۔

بالی وڈ انڈسٹری جسے دنیا کی دوسری بڑی فلم انڈسٹری کا درجہ حاصل ہے وہاں کرپشن پر نہ صرف بے انتہا فلمیں بنائی بلکہ انہوں نے معاشرے کو جھنجھوڑ کررکھ دیا بھارتی فلم انڈسٹری میں تو سیاستدانوں کی کرپشن فلم سازوٕں کا بہترین موضوع  ہے اور آئے دن اس پر فلمیں بنائی جاتی ہیں اور بیشتر سپرہٹ بھی ہوئی۔

رنگ دے بسنتی میں بالی ووڈ کے مسٹر پرفیکٹنس عامر خان نے اہم کردار ادا کیا اور اس میں بھارتی وزارت دفاع میں کرپشن کو بےنقاب کیا گیا وہ سپر ہٹ ثابت ہوئی۔

راج نیتی میں رنبیر کپور، ارجن رام پال، کترینہ کیف اور نانا پاٹیکر نے اہم کردار ادا کیا اس فلم میں خاندانی سیاست میں پائے جانے والی کرپشن پر سے پردہ اٹھایا گیا۔

اپاہرن میں اجے دیوگن اور نانا پاٹیکر نے اہم کردار ادا کیا جس میں اغوا برائے تاوان کے موضوع  کو زیر بحث بنایا گیا جس میں ریاست کے سیاست دان کو ان جرم میں شریک دکھایا گیا ہے۔

ناک آؤٹ میں سنجے دت اور عرفان خان نے اہم کردار ادا کیا، فلم میں دکھایا گیا کہ کیسے سیاست دان ملک سے کرپشن کے ذریعے دولت لوٹ کرسوئس بینکوں میں پہنچاتے ہیں۔

بھارت کی ان تمام فلموں پر تو کسی سنسر بورڈ اور سیاست دان نے آواز نہیں اٹھائی لیکن یہی پاکستان میں بنائی جاتیں تو فلم ساز سمیت ہدایت کار اور ہیرو کو جیل کی ہوا کھانا پڑ سکتی تھی۔