ایم کیوایم کے رکن سندھ اسمبلی محمد دلاور بھی مصطفیٰ کمال کی پارٹی میں شامل

 کراچی: پاک سرزمین پارٹی نے ایم کیو ایم کی ایک اور پتنگ کاٹ دی اور رکن سندھ اسمبلی محمد دلاور بھی مصطفیٰ کمال کی پارٹی میں شامل ہوگئے۔

کراچی میں پریس کانفرنس کرتے ہوئے ایم کیوایم کے رکن سندھ اسمبلی محمد دلاور نے متحدہ کو خیرباد کہتے ہوئے پاک سر زمین پارٹی میں شمولیت کا اعلان کیا اور ساتھ ہی سندھ اسمبلی کی رکنیت سے بھی استعفیٰ دے دیا۔ اس موقع پر مصطفیٰ کمال کا کہنا تھا کہ ہم لوگوں کو ناکام کرنے نہیں آئے لیکن ہماری کامیابی میں بہت سارے لوگوں کی ناکامی ہے۔

مصطفیٰ کمال نے آفتاب احمد کی موت پر دکھ اور تشویش کا اظہار کیا اور ہلاکت کی آزادانہ تحقیقات کا مطالبہ کرتے ہوئے کہا کہ آپریشن صرف ایم کیوایم کے لیے نہیں بلکہ شہر سے اور بھی گینگز پکڑے جارہے ہیں جب کہ لاشیں گرنا اور گرفتاریاں متحدہ کے لیے تقویت کا باعث ہے۔