دہشت گردی روکنے کے لیے تمام وسائل بروئے کار لائے جائیں گے، وزیراعلیٰ بلوچستان

کوئٹہ: وزیراعلیٰ بلوچستان نواب ثنااللہ زہری نے کوئٹہ بھرمیں سیکیورٹی کیمروں کی تنصیب جلد مکمل کرنے کی ہدایت کرتے ہوئے کہا کہ دہشت گردی روکنے کے لیے تمام وسائل بروئے کار لائے جائیں گے۔

ایکسپریس نیوز کے مطابق ایف سی ہیڈکوارٹرمیں وزیراعلیٰ بلوچستان نواب ثنااللہ زہری کی آئی جی ایف سی سے ملاقات ہوئی جس میں صوبائی وزیرداخلہ سرفراز بگٹی اورآئی جی پولیس سمیت سول وفوجی حکام بھی موجود تھے۔ ملاقات میں سیکیورٹی فورسز پرحملوں سمیت امن وامان کی صورتحال پرتبادلہ خیال کیا گیا۔

اس موقع پر وزیراعلیٰ بلوچستان نے کوئٹہ بھرمیں سیکیورٹی کیمروں کی تنصیب اور کوئٹہ سیف سٹی پروجیکٹ فوری مکمل کرنے کی ہدایت کرتے ہوئے کہا کہ دہشت گردی روکنے کے لیے تمام وسائل بروئے کار لائے جائیں گے۔