ملکی زرمبادلہ کے ذخائرتاریخ کی بلند ترین سطح پر پہنچ گئے، اسحاق ڈار

اسلام آباد: وزیرخزانہ اسحاق ڈار کا کہنا ہے کہ موجودہ حکومت کی کامیاب پالیسیوں کی بدولت ملکی زرمبادلہ کے ذخائر تاریخ کی بلند ترین سطح پر پہنچ گئے۔ 

اسلام آباد میں ای سی سی اجلاس کے بعد میڈیا سے بات کرتے ہوئے وفاقی وزیر خزانہ اسحاق ڈار کا کہنا تھا کہ ایف بی آر نے 3 ہزار104 ارب روپے کا ٹیکس محصولات کا ہدف حاصل کرلیا جبکہ زرمبادلہ کے ذخائر 23 ارب ڈالرز سے بھی تجاوز کرگئے ہیں جو کہ ملکی تاریخ کی بلند ترین سطح ہےاور اس وقت اسٹیٹ بینک کے پاس 18 ارب سے زائد جب کہ نجی بینکوں کے پاس 4.9 ارب ڈالرز ہیں۔ انہوں نے کہا کہ 3 سالوں میں صوبوں کا ترقیاتی بجٹ 1900 ارب تک پہنچ گیا ہے جب کہ وزیر اعظم نواز شریف، ایف بی آر اور قوم کو کامیاب بجٹ پر مبارکباد پیش کرتا ہوں۔