وزیراعظم نے توانائی کے منصوبوں میں پیش رفت کی ہر 15 دن میں رپورٹس طلب کرلیں

بجلی کی پیداوار بڑھنے سے صنعتی سرگرمیوں میں اضافہ ہوگا، وزیر اعظم فوٹو: فائل

---

وزیر اعظم نواز شریف نے متعلقہ وزیروں اور حکام سے ملک میں جاری توانائی کے منصوبوں میں ہونے والی پیش رفت سے متعلق ہر 15 روز میں رپورٹس طلب کرلیں۔

وزیر اعظم نواز شریف کی زیر صدارت توانائی بحران سے متعلق اعلیٰ سطح کا اجلاس ہوا ۔ اجلاس میں وفاقی وزیر پانی وبجلی خواجہ آصف، وزیرپیٹرلیم شاہد خاقان عباسی اور وزیر اعلیٰ پنجاب شہباز شریف نے بھی شرکت کی۔ اجلاس میں ملک میں جاری توانائی منصوبوں پر ہونے والی پیش رفت کا جائزہ لیا گیا۔

ترجمان وزیر اعظم ہاؤس کے مطابق نواز شریف کا کہنا تھا کہ بجلی کی پیداوار کے حوالے سے رواں سال گزشتہ 10 سال کے مقابلے میں بہترین رہا جس میں بہت سے نئے ترقیاتی منصوبوں کا آغاز کیا گیا اگر ملک میں جاری توانائی منصوبوں کی بروقت تکمیل ہوجائے تو پاکستان میں جاری لوڈشیڈنگ کا مکمل خاتمہ ہوجائے گا۔

وزیر اعظم نے کہا کہ بجلی کی پیداوار بڑھنے سے صنعتی سرگرمیوں میں اضافہ ہوگا اور ملک معاشی ترقی کی جانب تیزی سے گامزن ہوگا اس لئے بجلی کے منصوبوں کو بروقت مکمل کیا جائے اور ہر 15 روز بعد منصوبوں پر پیشرفت کی رپورٹ پیش کی جائے۔