بوبی دیول کی کنسرٹ میں خراب پرفارمنس پرلوگوں نے ہنگامہ شروع کردیا

نئی دلی: بالی ووڈ میں فلموں کی ناکامی کے بعد ڈی جے بننے والے اداکار بوبی دیول کی پرفارمنس نے کنسرٹ میں شریک افراد  کو پیسے واپس مانگنے پر مجبور کردیا۔

بالی ووڈ اداکار بوبی دیول نے 1995 میں ریلیز ہونے والی فلم ’’برسات‘‘ سے فنی سفر کا آغاز کیا اور اپنے فلمی کیرئیر میں بوبی دیول نے متعدد فلموں میں اداکاری کے جوہر دکھائے ہیں جس میں ’’سولجر‘‘،’’بادل‘‘،’’بچھو‘‘ اور ’’یملہ پگلہ دیوانہ‘‘ شامل ہیں تاہم بوبی دیول دیگراداکاروں کی موجودگی میں فلم نگری میں جگہ نہیں بنا پائے جس پر ہدایتکاروں نے انہیں فلموں میں کاسٹ کرنے سے انکار کردیا لیکن گزشتہ دنوں اداکار نے ڈی جے بننے کا اعلان کرتے ہوئے دہلی میں کنسرٹ کرنے کا فیصلہ کیا تھا جو بری طرح ناکام ثابت ہوگیا۔

اس خبر کو بھی پڑھیں:فلموں میں مسلسل ناکامی پر بوبی دیول ڈی جے بن گئے

میڈیا رپورٹس کے مطابق اداکار بوبی دیول کے دہلی میں ہونے والے پہلے کنسرٹ کے ٹکٹ مہنگے داموں فروخت کیے گئے  لیکن کنسرٹ میں ڈی جے بوبی دیول کی پرفارمنس نے مداحوں کو بور کردیا جس پر دوران کنسرٹ ہی ہنگامہ شروع ہوگیا اور وہاں موجود لوگوں نے انتظامیہ سے ٹکٹ کے پیسے واپس کرنے کا مطالبہ کیا جس پر اداکار کو فوری طور پر کنسرٹ کو ادھورا چھوڑ کر جانا پڑا۔