ٹرمپ کی کیوبا کو تعلقات کی بحالی سے متعلق معاہدہ ختم کرنے کی دھمکی

واشنگٹن: نومنتخب صدر ڈونلڈ ٹرمپ نے امریکا کے ساتھ اچھا برتاؤ نہ رکھنے پر کیوبا کو دھمکی دیتے ہوئے کہا ہے کہ اگر کیوبا نے امریکا کے ساتھ اچھا برتاؤ نہ کیا تو وہ دونوں ممالک کے تعلقات کی بحالی کے معاہدے کوختم کردیں گے۔

غیرملکی خبررساں ادارے کے مطابق امریکا کے سابق صدربراک اوباما نے 2015 میں کیوبا کے دورے کے بعد امریکا اورکیوبا کے سفارتی تعلقات کو بحال کیا تھا جسے اب ڈونلڈ ٹرمپ بحال رکھنا نہیں چاہتے ہیں۔ امریکا کے نو منتخب صدرڈونلڈ ٹرمپ نے سماجی رابطے کی ویب سائٹ ٹوئٹرپرایک بارپھرکیوبا کی حکومت اورعوام کو کھلی دھمکی دیتے ہوئے کہا ہے کہ اگرکیوبا نے اچھا برتاؤ نہ رکھا تو وہ تعلقات کے بحالی کے فیصلے کو ختم کردیں گے جب کہ وہ اس سے قبل بھی اپنی انتخابی مہم کے دوران متعدد بارکیوبا سے تعلقات ختم کرنے کی دھمکیاں دیتے رہے ہیں۔

نومنتخب صدرکی جانب سے کیوبا کودھمکی اس وقت دی گئی ہے جب کیوبا کے عوام اپنے سابق صدراورانقلاب کی علامت سمجھے جانے والے رہنما فیڈل کاستروکے دنیا سے گزرجانے کے غم میں ہیں۔

If Cuba is unwilling to make a better deal for the Cuban people, the Cuban/American people and the U.S. as a whole, I will terminate deal.

— Donald J. Trump (@realDonaldTrump) November 28, 2016

واضح رہے کہ کیوبا اورامریکا کے درمیان دہائیوں سے جاری سرد جنگ اس وقت ختم ہوئی تھی جب گزشتہ سال امریکی صدراوباما تاریخی دورے پرکیوبا پہنچے تھے جوکسی بھی امریکی صدرکا 88 سال میں کیوبا کا پہلا دورہ تھا جسے دونوں ملکوں کے کشیدہ تعلقات کی فضا میں دوستی کی خوشگوار ہوا کا جھونکا قراردیا گیا تھا۔