بھارت اور افغانستان نے ہماری امن کی خواہش کا مناسب جواب نہیں دیا، طارق فاطمی

واشنگٹن: وزیراعظم نواز شریف کے معاون خصوصی طارق فاطمی کا کہنا ہے کہ دہشت گردی کے خاتمے کے لیے پاکستان نے ہزاروں جانوں کی قربانی دی لیکن بھارت اور افغانستان سے ہماری امن کی خواہش کا مناسب جواب نہیں ملا۔

وزیراعظم نواز شریف کے معاون خصوصی طارق فاطمی نے واشنگٹن میں امریکی خارجہ پالیسی کے ماہرین اور حکومتی نمائندوں سے ملاقاتیں کیں جس میں ان کا کہنا تھاکہ نو منتخب امریکی صدر کے جنوبی ایشیا کے تنازعات حل کرنے سے متعلق اعلانات نہ صرف خوش آئند ہیں بلکہ سیکیورٹی اور اقتصادی معاملات کے حوالے سے پاکستان اور امریکا ایک دوسرے کے اسٹریٹجک ساتھی بھی ہیں جب کہ دونوں ممالک کے درمیان تعلقات میں ڈونلڈ ٹرمپ کےآنے کے بعد مزید بہتری کی بھی امید ہے۔

طارق فاطمی نے کہا کہ دہشت گردی کے خاتمے کے لیے پاکستان نے ہزاروں جانوں کی قربانی دی جب کہ بھارت اور افغانستان سے ہماری امن کی خواہش کا مناسب جواب نہیں ملا۔ ان کا کہنا تھا کہ پاک چین اقتصادی راہداری منصوبہ ایک پیش رفت ہے جس میں تمام ممالک شامل ہوسکتے ہیں اور اس سے ہر ملک کو فائدہ ہو گا۔