ہالی ووڈ اداکار وین ڈیزل دیپیکا کے لیے بھارت پہنچ گئے

ویب ڈیسک  جمعرات 12 جنوری 2017
 ہالی ووڈ اداکار کی جانب سے میکسیکو میں ڈمپل گرل کی سالگرہ منائی گئی تھی،فوٹو: بشکریہ فرسٹ پوسٹ

ہالی ووڈ اداکار کی جانب سے میکسیکو میں ڈمپل گرل کی سالگرہ منائی گئی تھی،فوٹو: بشکریہ فرسٹ پوسٹ

ممبئی: ہالی ووڈ اداکار وین ڈیزل دپیکا پڈوکون کی دعوت پر بھارت پہنچ گئے جہاں ہالی ووڈ فلم ’’ٹریل ایکس:ریٹرن آف ژینڈر کیج‘‘ کی تشہیری مہم میں شرکت کریں گے۔

بالی ووڈ اداکارہ دپیکا پڈوکون بھارتی فلم نگری میں کامیابی کے بعد ہالی ووڈ میں قدم جمانے کی کوششوں میں مصروف ہیں اور جلد ہی نامی گرامی اداکار وین ڈیزل کے ساتھ فلم ’’ٹرپل ایکس: ریٹرن آف ژینڈر کیج‘‘ میں ایکشن میں نظر آئیں گی جب کہ  دونوں اداکاروں کی فلم کے علاوہ بھی اچھی کیمسٹری دیکھنے کو مل رہی ہے اورگزشتہ دنوں ہالی ووڈ اداکار کی جانب سے میکسیکو میں ڈمپل گرل کی سالگرہ منائی گئی تھی لیکن اب وین ڈیزل دپیکا کے لیے بھارت بھی پہنچ گئے ہیں۔

ہالی ووڈ اداکار وین ڈیزل اور فلم کے ہدایت کار ڈی جے کروسو دپیکا پڈوکون کی دعوت پر ممبئی پہنچے ہیں جنہیں ڈمپل گرل خود ہی لینے ایئرپورٹ پہنچیں جہاں ان کا استقبال بینڈ باجے اورروایتی طریقے سے کیا گیا۔ وین ڈیزل دپیکا کے ساتھ مل کر اپنی فلم کی تشہیر کریں گے اور فلم  سب سے پہلے 14 جنوری کو بھارت میں نمائش کے لیے پیش کی جائے گی۔

دوسری جانب اداکارہ کی جانب سے وین ڈیزل کے لیے گرینڈ پارٹی بھی رکھی گئی ہے جس میں بالی ووڈ کی نامی گرامی شخصیات شرکت کریں گی ۔

واضح رہے کہ وین ڈیزل اور دپیکا پڈوکون کی فلم’’ٹرپل ایکس: ریٹرن آف ژینڈر کیج‘‘ بھارت میں 14 جنوری جب کہ  دنیا بھر میں 20 جنوری کو نمائش کے لیے پیش کی جائے گی، تاریخ میں پہلی مرتبہ کوئی ہالی ووڈ فلم پہلے بھارت میں ریلیز کی جارہی ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔