کراچی: لانڈھی اور کورنگی کراسنگ میں 2 دھماکے، 3 افراد جاں بحق، 7 زخمی

کراچی: لانڈھی اولڈ مظفرآباد کالونی میں رینجرز ہیڈ کوارٹرز کے قریب دھماکے کے نتیجے میں 3 افراد جاں بحق اور 4 زخمی ہوئے جبکہ کورنگی کراسنگ کے قریب بس کا سلنڈر پھٹنے سے 3 افراد زخمی ہوگئے۔

ایکسپریس نیوز کے مطابق لانڈھی میں اولڈ مظفر آباد کالونی میں دھماکا گنجان آباد علاقے میں ہوا جس کی آواز دور دور تک سنائی دی، دھماکے میں 3 افراد جاں بحق اور 4 زخمی ہوگئے۔ ایس ایس پی ایسٹ عمران شوکت کے مطابق دھماکا کیبل کی دکان کے قریب رکشے میں ہوا تاہم دھماکے کی نوعیت سے متعلق ابھی کچھ بھی کہنا قبل از وقت ہوگا۔ دھماکے سے قریبی کھڑی موٹرسائیکل اور رکشہ مکمل طور پر تباہ ہوگئے۔ پولیس اور بم ڈسپوزل اسکواڈ کی ٹیموں نے جائے وقوعہ پر پہنچ کر علاقے کو گھیرے میں لے کر شواہد اکٹھے کرکے تحقیقات کا آغاز کردیا گیا ہے۔

لاشوں کو جناح اسپتال جبکہ زخمیوں کو سوشل سیکیورٹی اسپتال منتقل کردیا ہے جہاں انہیں طبی امداد فراہم کی جارہی ہے تاہم چند کی حالت تشویشناک ہے جس کے باعث ہلاکتوں میں اضافے کا خدشہ ہے۔

رات گئے دوسرا دھماکا کورنگی کراسنگ کے قریب بس کا سلنڈر پھٹنے سے ہوا جس کے نتیجے میں 3 افراد زخمی ہوگئے۔