مس عراق کی سیلفی نے اہل خانہ کو وطن چھوڑنے پر مجبور کردیا

نیویارک: مس اسرائیل کے ساتھ سیلفی کے بعد مس عراق کے اہل خانہ ملنے والی دھمکیوں کے بعد وطن چھوڑنے پر مجبور ہوگئے۔

بین الاقوامی میڈیا رپورٹس کے مطابق گزشتہ ماہ نومبر میں لاس ویگاس میں منعقدہ مس یونیورس کے مقابلے کی امیدواروں مس اسرائیل عدر گینڈلز اور مس عراق سارہ عدن کی لی گئی سیلفی نے سوشل میڈیا پر بھونچال برپا کردیا تھا، اسرائیلی ماڈل کے ساتھ عراقی دوشیزہ کی تصویر پر سخت ردعمل سامنے آیا جبکہ بعض لوگوں نے اسے پسند بھی کیا۔

یہ بھی پڑھیں: کینیڈا کی ماڈل کو آنکھ پر ٹیٹو بنوانا مہنگا پڑگیا

تصویر وائرل ہونے کے بعد مس عراق کے اہل خانہ کو قتل کی دھمکیوں کے ساتھ ساتھ انہیں زدوکوب اور خوف زدہ کرنے کی شکایات بھی موصول ہوئیں جس کے بعد وہ جان کے خطرے کے پیش نظر خاموشی کے ساتھ عراق چھوڑ کر امریکا میں اپنی بیٹی کے پاس چلی گئیں۔

دھمکیوں کے حوالے سے ٹوئٹر پر جاری پیغام میں مس عراق نے لکھا ہے کہ میں پہلی اور آخری عراقی نہیں جو اپنی ذاتی آزادی کے حوالے سے ایسے مقدمات کا سامنا کررہی ہے، میری جیسی لاکھوں عراقی خواتین اور ہیں جو اس صورتحال سے گزر رہی ہیں۔

I’m not the first nor the last person to face prosecution over a matter of personal freedom. Millions of Iraqi women live in fear. #freeiraqiwomen https://t.co/Vt0YjFbyf4

— Sarai (Sarah Idan) (@grrrciara) December 15, 2017

گزشتہ ماہ ہی سارہ عدن نے اسرائیلی ماڈل کے ساتھ لی گئی تصویر پر معذرت کرتے ہوئے واضح کیا تھا کہ تصویر شیئر کرنے کا مقصد ہرگز اسرائیلی حکومت یا اس کی پالیسیوں کو اجاگر کرنا نہیں تھا، میں ان سب سے معافی چاہتی ہوں جنہیں محسوس ہوا کہ اس فعل سے فلسطینی کاز کو نقصان پہنچا۔

واضح رہے کہ عراق نے اسرائیل کو اب تک تسلیم نہیں کیا اور دونوں ممالک کے درمیان سفارتی تعلقات قائم نہیں ہیں۔