سرد سائبیرین ہوائیں گرد آلود ہواؤں میں تبدیل، سردی کی لہر جاری رہے گی

کراچی: تندوتیز اور سرد سائبیرین ہوائیں کراچی کی فضائی آلودگی کے باعث گرد آلود ہواؤں میں تبدیل ہوگئیں۔

محکمہ موسمیات کراچی کے مطابق گزشتہ 3روز سے سردی کا باعث بننے والی سرد ہواؤں کی رفتار ہفتے کے روز 50 کلومیٹر فی گھنٹہ ریکارڈ کی گئی جب کہ گزشتہ روز شہر میں گرد آلود ہوائیں بھی ریکارڈکی گئیں جس کی وجہ سے حد نگاہ 6کلومیٹر سے کم ہو کر 4 کلومیٹر رہ گئی تھی، گرد آلود ہواؤں کا اثر شہر کے دیگر علاقوں کے مقابلے میں مضافاتی علاقوں میں زیادہ رہا۔

محکمہ موسمیات کا کہناہے کہ آج شہر کا کم سے کم درجہ حرارت10ڈگری سینٹی گریڈ تک گرنے کی توقع ہے تاہم تیز اور گرد آلود ہواؤں کا سلسلہ آج کو بھی برقرار رہنے کا امکان ہے جب  کہ حالیہ سردی کی لہر کا خاتمہ منگل تک ہوجائے گا، موسم معتدل ہونے کا امکان ہے۔