ایکسپریس میڈیا گروپ کے’’ٹیلنٹ ہب ‘‘ سے نوجوانوں کوصلاحیتوں کے اظہار کا موقع ملا، مہر حسن

 لاہور:  اداکارہ مہرحسن نے کہا ہے کہ جب تک نوجوان ٹیلنٹ کواپنا فن متعارف کروانے کے بہترمواقع فراہم نہیں کیے جائیں گے  اس وقت تک فلم، ٹی وی ، تھیٹراور میوزک کے شعبوں میں بہتری ممکن نہیں۔

انٹرنیشنل مارکیٹ تک پہنچنے کیلیے ایسے پروگرام ترتیب دینے کی ضرورت ہے، جس کے ذریعے نوجوان اپنی فنی صلاحیتوں کا اظہار کرسکیں۔ ان خیالات کا اظہارانھوں نے ’’ایکسپریس‘‘سے گفتگوکرتے ہوئے کیا۔ مہرحسن نے کہا کہ پاکستان میں ٹیلنٹ کی کوئی کمی نہیں ہے لیکن اس کے باوجود ہرسال بہت سے نوجوان لڑکے اورلڑکیاں بہترپلیٹ فارم نہ ملنے کی وجہ سے دوسرے شعبوں کی جانب چلے جاتے ہیں۔ لیکن جس طرح سے ’’ایکسپریس میڈیا گروپ ‘‘ نے نوجوان ٹیلنٹ کواپنی فنی صلاحیتوں کے اظہارکا موقع فراہم کرنے کیلیے باقاعدہ ایک ادارہ ’ٹیلنٹ ہب ‘ کے نام سے قائم کیا ہے، اس پربے حد خوشی ہوئی ہے۔

جس طرح سے ملک بھرمیں نوجوان فنکاروں کے ایکٹنگ، ماڈلنگ اورمیوزک کے ساتھ ساتھ رائٹنگ، ڈائریکشن اوردیگرتکنیکی شعبوں کے آڈیشن کیے گئے ہیں، اسی طرح ہم اپنی نئی ٹیم تیارکرسکتے ہیں۔ یہی وجہ ہے کہ آج دنیا بھرکی ترقی یافتہ فلم نگریوں کی کامیابی نوجوانوں کی آمد سے برقرار ہے۔ ایک طرف توسینئرلوگ اپنا کام کررہے ہیں لیکن نوجوان ٹیلنٹ جب ان کے ساتھ مل کر اپنی صلاحیتیں متعارف کرواتا ہے توشائقین کوہمیشہ کچھ نیا دیکھنے کو ملتا ہے۔

اسی لیے میرے نزدیک ایکسپریس میڈیا گروپ کا یہ پروجیکٹ بہت اہمیت کاحامل ہے۔ مجھے امید ہے کہ اس پلیٹ فارم سے مستقبل میں پاکستانی فلم، ٹی وی ، تھیٹر، فیشن اورمیوزک کے شعبے میں بہترین نوجوان پرفارم کرتے دکھائی دینگے۔ ایک سوال کے جواب میں مہرحسن نے کہا کہ جب مجھے شوبز کی دنیا میں کام کرنے کا موقع ملا تو میں نے اس کیلیے بڑی محنت کی۔

اس سلسلے میں میرے استاد معروف کوریوگرافر خانوسمراٹ مرحوم کی رہنمائی ساتھ رہی۔ انھوں نے ہرقدم پرمجھے سمجھایا اوربہترانداز سے کام کرنے کا ہنر دیا۔ ان جیسے لوگ جب نوجوانوں کی تربیت کرتے ہیں تونتائج بہت عمدہ ہوتے ہیں۔ اس لیے ضروری ہے کہ پاکستان میں فنون لطیفہ کے تمام شعبوں میں سینئرز کے تجربے سے استفادہ کیا جائے اوران کے ذریعے نوجوانوں کو کام دیاجائے۔