ڈاکٹر فوزیہ صدیقی کا پرویز مشرف کے خلاف الیکشن لڑنے کا فیصلہ

کراچی: امریکا میں قید ڈاکٹر عافیہ صدیقی کی بہن ڈاکٹر فوزیہ صدیقی نے عام انتخابات میں این اے 250 سے سابق صدر پرویز مشرف کے خلاف کھڑے ہونے کا فیصلہ کیا ہے۔

ڈاکٹر فوزیہ صدیقی نے سپورٹرز کی بڑی تعداد کے ساتھ سٹی کورٹ میں کاغذات نامزدگی جمع کرائے۔ اس موقع پر انہوں نے کہا کہ جس طرح مادر ملت فاطمہ جناح ایک آمر كے خلاف میدان سیاست میں آئی تھیں وہ بھی اسی جذبے كے تحت ایک آمر كے خلاف  نكل كر آئی ہیں۔ انھوں نے كہا كہ وہ پرویز مشرف كے خلاف این اے 250 میں  بھرپور طریقے سے الیكشن لڑیں گی۔

ڈاکٹر فوزیہ صدیقی کا کہنا تھا کہ وہ کسی صورت انتخابات سے دستبردار نہیں ہونگی اور ملک وقوم كے جس بیٹے وبیٹی كو غیروں كے ہاتھوں بیچا گیا ہے اسے حق دلانے کے لئے لڑیں گی۔ انہوں نے اس موقع پر عوام سے اپیل کی وہ ان کا بھرپور ساتھ دیں۔