بلوچستان میں نیشنل ٹیکسٹائل یونیورسٹی کا کیمپس بنے گا

حسیب حنیف  اتوار 25 فروری 2018
ٹیکسٹائل ڈویژن نے پروجیکٹ کے لیے وفاقی حکومت سے 3ارب روپے مانگ لیے،دستاویز
 فوٹو: فائل

ٹیکسٹائل ڈویژن نے پروجیکٹ کے لیے وفاقی حکومت سے 3ارب روپے مانگ لیے،دستاویز فوٹو: فائل

 اسلام آباد: وفاقی حکومت نے ملک میں ٹیکسٹائل سیکٹر کے فروغ اور ہنرمند افراد قوت میں اضافے کے لیے بلوچستان میں نیشنل ٹیکسٹائل یونیورسٹی ( این ٹی یو ) کا کیمپس بنانے کا فیصلہ کیا ہے جس کے لیے ٹیکسٹائل ڈویژن نے وفاقی حکومت سے 3ارب روپے مانگ لیے ہیں۔

’’ایکسپریس‘‘ کو موصول دستاویز کے مطابق وفاقی حکومت کی جانب سے ملک کے ٹیکسٹائل سیکٹر کے فروغ کے لیے مختلف مقامات پر نیشنل ٹیکسٹائل یونیورسٹی فیصل آباد (این ٹی یو) کے کیمپس قائم کرنے کا فیصلہ کیا گیا ہے،اس سلسلے میں چند ماہ قبل ٹیکسٹائل ڈویژن کی جانب سے صوبہ سندھ، خیبر پختونخوا، پنجاب اور بلوچستان کی صوبائی حکومتوں کو مراسلہ بھی ارسال کیا گیا تھا، نیشنل ٹیکسٹائل یونیورسٹی فیصل آباد( این ٹی یو ) ٹیکسٹائل ڈویژن کے ماتحت ہے جو ٹیکسٹائل سے متعلقہ مضامین میں گریجویٹ، انڈر گریجویٹ سمیت متعدد پروگرامز اور کورسز کراتی ہے۔ مراسلے میں صوبائی حکومتوں سے نیشنل ٹیکسٹائل یونیورسٹی کے سب کیمپس کھولنے کے لیے تعاون مانگا گیا تھا۔

جس پر خیبر پختونخوا اور بلوچستان کی حکومتوں نے رضامندی ظاہر کی تھی جس پر وفاقی حکومت نے پہلے مرحلے میں آئندہ مالی سال بلوچستان میں کیمپس قائم کرنے کافیصلہ کیاہے جس کے لیے ٹیکسٹائل ڈویژن کی جانب سے حکومت سے 3 ارب روپے مانگے ہیں۔ ذرائع کا کہنا ہے کہ پنجاب میں ٹیکسٹائل ڈویژن کی جانب سے گوجرانوالہ میں این ٹی یو کا سب کیمپس قائم کرنے کی تجو یز زیرغور ہے، اسی طرح خیبر پختونخوا میں ڈی آئی خان میں بھی سب کیمپس قائم کیے جانے کی تجویز زیرغور ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔