تحریک انصاف لاہور میں بڑا امیدوار لانے میں ناکام، پارٹی میں پریشانی

لاہور: تحریک انصاف کا مرکزی پارلیمانی بورڈ مسلم لیگ(ن) کے گڑھ لاہور میں کوئی بڑا امیدوار دینے میں ناکام رہا ہے۔

جاوید ہاشمی نے لاہور کو’’ڈس اون‘‘کرتے ہوئے یہاں الیکشن لڑنے سے انکار کر دیا ہے جبکہ گزشتہ رات ہونیوالے فیصلوں پر تحریک انصاف کے اندر شدید پریشانی جبکہ مسلم لیگ(ن) کے حلقوں میں طمانیت کی لہر پھیل گئی ہے۔

نامزد امیدواروں کی اکثریت الیکشن میں جیت کے کم چانسز  رکھتی ہے جبکہ تحریک انصاف کو لاہور میں مضبوط بنانے کیلیے دن رات ایک کر دینے والے متعدد کارکنوں کو ٹکٹ نہیں مل سکے ہیں۔ تفصیلات کے مطابق پارلیمانی بورڈ کے اجلاس میں لاہور سے تعلق رکھنے والے ’’جماعتی گروپ‘‘ نے منظم انداز میں عمران خان پر نفیساتی دبائو بڑھا کر ایسے فیصلے کروائے ہیں جن سے لاہور میں تحریک انصاف کی الیکشن پوزیشن کمزور محسوس ہو رہی ہے۔