اسرائیلی فوج کی فائرنگ سے ایک فلسطینی نوجوان شہید، 66 زخمی

غاصب فوج کی بربریت کا سلسلہ جاری، 2 فلسطینی گولیوں، 19 ربرکی گولیوں، 45 گیس کے شیل اور تشدد کی وجہ سے زخمی ہوئے۔

خبر ایجنسیاں اتوار 11 مارچ 2018

امریکی صدر ٹرمپ کی جانب سے القدس کو فلسطین کا دارالحکومت قرار نہ دیے جانے کے بعد سے احتجاج کا سلسلہ بدستور جاری ہے۔ فوٹو: اے ایف پی

غزہ: فلسطین کے علاقے باب الزاویہ میں غاصب اسرائیلی فوج کے ہاتھوں ایک فلسطینی نوجوان شہید اور66 زخمی ہو گئے۔

فلسطین کی ہلال احمر نے کہا ہے کہ فلسطینی شہریوں کے خلاف اسرائیل کی بربریت کا سلسلہ جاری ہے، الخلیل کے علاقے باب الزاویہ میں غاصب اسرائیلی فوج کی فائرنگ سے ایک فلسطینی نوجوان شہید اور66 زخمی ہو گئے۔

فلسطینی خبررساں ایجنسی کی رپورٹ کے مطابق فلسطینی شہریوں کیخلاف اسرائیل کی بربریت کا سلسلہ جاری ہے، باب الزاویہ میں اسرائیلی فوج نے فائرنگ کرکے 24 سالہ فلسطینی نوجوان محمد زین الجعبری کو شہید کردیا، الجعبری اسرائیلی فوج کی فائرنگ سے زخمی ہوئے تھے جو اسپتال پہنچنے کے بعد شہید ہوگئے۔

فلسطین کی ہلال احمر کی رپورٹ کے مطابق 2 فلسطینی گولیوں سے19 فلسطینی ربرکی گولیوں سے اور 45 فلسطینی گیس کے شیل لگنے اور صیہونی فوجیوں کے تشدد کی وجہ سے زخمی ہوئے۔

ادھر امریکی صدر ٹرمپ کی جانب سے القدس کو فلسطین کا دارالحکومت قرار نہ دیے جانے کے بعد دنیا کے کئی ممالک اور فلسطین میں احتجاج کا سلسلہ شروع ہوا جو بدستور جاری ہے۔