جمعہ کی نماز کیا ہے؟جو مولوی پڑھاتا ہے پڑھ کر گھر چلا جاتا ہوں

اسٹاف رپورٹر  جمعـء 5 اپريل 2013
مسلم لیگ فنکشنل کے نندلعل اسکروٹنی کے لیے ریٹرننگ افسرکو اپنے کاغذات پیش کررہے ہیں ۔ فوٹو : ایکسپریس

مسلم لیگ فنکشنل کے نندلعل اسکروٹنی کے لیے ریٹرننگ افسرکو اپنے کاغذات پیش کررہے ہیں ۔ فوٹو : ایکسپریس

کراچی: ضلع ملیر کے حلقوں سے عام انتخابات میں حصہ لینے والے درجنوں امیدوار قومی ترانہ،دین، جغرافیہ اورمعلومات عامہ سے نابلد ثابت ہوئے ہیں ۔

تفصیلات کے مطابق جمعرات کو ضلع ملیر کی قومی اسمبلی کی نشستوں این اے 258 اور 257 اور صوبائی اسمبلی کی نشستوںپی ایس 127،پی ایس 128پی ایس129، پی ایس130کے ریٹرننگ افسران نے نامزدگی کاغذات کی اسکروٹنی کے لیے درجنوں امیدواروں کو عدالت میں طلب کیا تھا اس موقع پر ریٹرننگ افسران نے کئی امیدواروں سے قومی ترانہ سنانے کو کہا جو امیدوار نہ سناسکے۔

ایک امیدوار کو پاکستان کے پہلے گورنر جنرل کا پتہ نہیں تھا ،ایک امیدوار پاکستان پہلا آئین کب بنا کا جواب نہ دے سکے، آزاد امیدوار حسین بخش جوکھیو سے ریٹرننگ افسر نے جمعے کی فرض نماز سے متعلق سوال کیا تو انھو ں نے کہا کہ امام صاحب جو جمعے کی نماز پڑھاتے ہیں وہ وہی پڑھتے ہیں۔

اسکے بعد گھر چلے جاتے ہیں ، ملیر کورٹ میں اسکروٹنی کے چوتھے روز مولانا غیاث ، احسان اﷲ ، شمس العارفین ، رئیس ، رانا صفدر ، فضل حق ، قربان علی سمیت104کے قریب امیدوارں کے کاغذات کی اسکروٹنی کی گئی، تاہم فی الحال کسی بھی امیدوار کے کاغذات نامزدگی مسترد نہیں کیے گئے ہیں۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔