اجے دیوگن نے کپل شرما سے پرانا بدلہ لے لیا

ویب ڈیسک  منگل 13 مارچ 2018
کپل شرما کا نیا شو’’فیملی ٹائم ود کپل شرما‘‘ جلد آن ایئر ہوگا۔ فوٹو: فائل

کپل شرما کا نیا شو’’فیملی ٹائم ود کپل شرما‘‘ جلد آن ایئر ہوگا۔ فوٹو: فائل

ممبئی: نامور بالی ووڈ اداکار اجے دیوگن نے کپل شرما پر اپنا غصہ اتارتے ہوئے ان سے ایک سال پرانا بدلہ لے لیا۔

سال 2017 بھارتی کامیڈین واداکار کپل شرما کے لئے بہت برا ثابت ہوا کیوں کہ سال کے ابتدا میں ہی ساتھی اداکار سنیل گرور کے ساتھ ہونے والے جھگڑے نے کپل کے کیریئر اور صحت دونوں پر گہرے اثرات مرتب کیے اور اسی وجہ سے وہ متعدد بار اپنے کامیڈی شو کے سیٹ پر بے ہوش بھی ہوئے۔

خرابی صحت کے باعث کئی بار بالی ووڈ اسٹارز کو شو پر مدعو کرنے کے باوجود وہ خود سیٹ پر نہیں پہنچ سکے اور ایسا ہی کچھ اجے دیوگن کے ساتھ بھی ہوا، گزشتہ برس جب وہ اپنی فلم کی تشہیر کے لیے ’دی کپل شرما شو‘ پر پہنچے لیکن گھنٹوں انتظار کے بعد جب کپل  سیٹ پر نہیں آئے تو اجے دیوگن غصے میں وہاں سے چلے گئے تاہم ایک برس گزر جانے کے بعد بالآخر اجے دیوگن نے کپل سے اپنا بدلہ لے لیا۔

اس خبرکوبھی پڑھیں: کپل کے بعد ان کی بیوی بھی اسپتال منتقل

سوشل میڈیا پر ایک ویڈیو وائرل ہورہی ہے جو دراصل کپل شرما کے نئے کامیڈی شو کی ہے۔ ویڈیو میں کپل شرما اجے دیوگن کو فون کرکے انہیں اپنے شو پر مدعو کرنا چاہتے ہیں تاہم اجے دیوگن انہیں بالکل اسی طرح انتظار کراتے ہیں جس طرح کپل نے انہیں کرایا تھا۔ جس پر کپل شرمندہ لہجے میں کہتے نظر آرہے ہیں کہ میں اتنا بھی برا نہیں ہوں میرا وقت برا تھا اب پچھلی تمام باتوں کو بھول جائیں۔

واضح رہے کہ کپل شرماکا نیا مزاحیہ شو’’فیملی ٹائم ود کپل شرما‘‘ نجی چینل سے آن ایئر ہوگا تاہم ابھی شو کے نشر ہونے کی حتمی تاریخ کا اعلان نہیں کیا گیا ہے۔

ایکسپریس میڈیا گروپ اور اس کی پالیسی کا کمنٹس سے متفق ہونا ضروری نہیں۔