وزارت داخلہ نے اسلحے کی نمائش پر پابندی اور خصوصی اجازت نامے منسوخ کردیئے

اسلام آباد: ملک بھر میں اسلحہ کی نمائش پر پابندی عائد کردی گئی جب کہ  اسلحہ رکھنے کے خصوصی اجازت نامے بھی منسوخ کردیئے گئے ہیں۔

وزارت داخلہ کی جانب سے اس سلسلے میں چاروں صوبوں کو احکامات جاری کرتے ہوئے خلاف ورزی کرنے والوں کے خلاف سخت کارروائی کی ہدایت بھی کی گئی ہے اور کہا گیا ہے کہ اگر کوئی شخص اسلحہ کی نمائش کرتا ہوا پایا گیا تو متعلقہ تھانے کی پولیس ذمہ دار ہوگی۔

وزارت داخلہ کی جانب سے جاری کیے گئے احکامات میں چاروں صوبوں کو اسلحہ رکھنے کے خصوصی اجازت نامے بھی منسوخ کرنے کا حکم دیا گیا ہے، وزارت داخلہ کا کہنا ہے کہ اسلحے کے خصوصی اجازت نامے کے لئے نئی پالیسی مرتب کی جارہی ہے  جس  کے بعد اس کے حصول کے لئے دوبارہ درخواست دینا ہوگی۔