افغانستان میں مدرسے پر بمباری اقوام متحدہ نے تحقیقات شروع کردیں

انسانی حقوق کی ٹیم مدرسے پر بمباری کے نتیجے میں ہونے والی عام شہریوں کی اموات کی تفصیلات حاصل کررہی ہے

ویب ڈیسک April 03, 2018

مدرسے پر بمباری میں 70 سے زائد افراد جاں بحق اور 150 زخمی ہوچکے ہیں جن میں 50 عام شہری ہیں (فوٹو: فائل)

MANCHESTER, UK: اقوام متحدہ نے افغان صوبے قندوز میں مدرسے پر فضائی بمباری میں عام شہریوں کی اموات کی تحقیقات کا آغاز کردیا۔

افغانستان میں اقوام متحدہ کے معاون مشن کا کہنا ہے کہ ان کی ٹیمیں فضائی بمباری سے متاثرہ علاقے میں پہنچ گئی ہیں جو مدرسے پر بمباری کے نتیجے میں ہونے والی عام شہریوں کی ہلاکتوں کی تفصیلات حاصل کررہی ہیں۔

اپنے ٹوئٹر پیغام میں (یواین اے ایم اے ) نے بتایا کہ انسانی حقوق کی ایک ٹیم ضلع دشت ارچی میں بمباری کا نشانہ بننے والے مدرسے کے مقام پر موجود ہے ، یہ ٹیم بمباری میں عام شہریوں کی اموات سے متعلق خبروں کی حقیقت جاننے اور جانی نقصان کے حوالے سے سنجیدگی سے تمام تر پہلوؤں کا جائزہ لے رہی ہے۔

یہ بھی پڑھیں: افغان فضائیہ کی مدرسے پر بمباری سے 70 افراد جاں بحق، 150 زخمی

مشن نے تمام جماعتوں اور فریقین کو مسلح تصادم میں عام شہریوں کے جانی و مالی نقصان سے محفوظ رکھنے کی یاد دہانی بھی کرائی ہے۔

UNAMA actively looking in to disturbing reports of serious harm to civilians yesterday from airstrike at #DashtiArchi, #Kunduz. Human Rights team on ground establishing facts. All parties reminded of obligations to protect civilians from impact of armed conflict. #Afghanistan pic.twitter.com/aRANBzOBzO
— UNAMA News (@UNAMAnews) April 3, 2018

دوسری جانب اہلِ علاقہ کا کہنا ہے کہ افغان فورسز کی مدرسے پر فضائی بمبار میں 50 سے زائد عام شہری جاں بحق ہوئے جن میں زیادہ تر بچے شامل ہیں جب کہ 150 سے زائد زخمی ہیں۔

سرکاری حکام نے بمباری میں عام شہریوں کی اموات کی تردید کرتے ہوئے کہا ہے کہ اس کارروائی میں 20 طالبان جنگجو مارے گئے ہیں، یہ کارروائی طالبان کی اعلیٰ قیادت کی مدرسے میں موجودگی کی اطلاع پر کی گئی۔

واضح رہے کہ پیر کے روز مدرسے پر افغان فضائیہ کی ہیلی کاپٹرز سے بمباری کے نتیجے میں جاں بحق ہونے والے افراد کی تعداد 70 تک پہنچ چکی ہے جس میں کم سن بچے بھی شامل ہیں۔