سیکیورٹی فورسز نے اہلکاروں پر حملوں سمیت دہشت گردی کے دیگر واقعات میں ملوث تحریک طالبان کے دہشت گرد فضل الحق کو گرفتار کرلیا۔
وزیر اعلیٰ بلوچستان سرفراز بگٹی نے میڈیا سے گفتگو کرتے ہوئے بتایا کہ تحریک طالبان سے تعلق رکھنے والے دہشت گرد فضل الحق کو گرفتار کرلیا گیا ہے۔ ملزم نے فورسز پر حملوں سمیت دہشت گردی کے 11 واقعات کا اعتراف کیا ہے ملزم افغانستان میں تربیت حاصل کرنے والے 6 رکنی گروپ کا رکن ہے۔
سرفراز بگٹی نے کہا کہ فورسز کی قربانیوں سے صوبے میں مذہبی دہشت گردی کا خاتمہ ہوچکا ہے لیکن مقامی لوگوں کو دہشت گردی کے لیے استعمال کیا جارہا ہے، این ڈی ایس اور را دہشت گردی میں ملوث اور نہتے لوگوں کو نشانہ بنا رہی ہیں۔
وزیر اعلیٰ نے مزید کہا کہ افغانستان کے علاقے اسپن بولدک میں دہشت گردی کے مراکز ہیں اس لیے بلوچستان سے افغان مہاجرین کا انخلا چاہتے ہیں، وفاق اس معاملے میں اقدامات کرے کیوں کہ مہاجرین کی آڑمیں افغانستان سے دہشت گرد بھی آتے ہیں۔