سعد رفیق کے گرد نیب کا گھیرا تنگ بینک اکاؤنٹس کی تفصیلات طلب

نیب کا اسٹیٹ بینک کو خواجہ برادران کے اکاؤنٹس میں 5 لاکھ روپے سےزائد ہونےوالی لین دین کا ریکارڈ حاصل کرنے کیلیے مراسلہ

ویب ڈیسک April 05, 2018

پیراگون سٹی مین مبینہ کرپشن کے خلاف انکوئری میں اہم پیش رفت،فوٹو:فائل

SHANGHAI: نیب نے وفاقی وزیر ریلوے خواجہ سعد رفیق اور خواجہ سلمان رفیق کے بینک اکاؤنٹس اور ٹرانزیکشنز کی تفصیلات طلب کرلیں۔

ایکسپریس نیوز کے مطابق پیراگون سٹی مین مبینہ کرپشن کے خلاف انکوئری میں اہم پیش رفت ہوئی ہے، نیب لاہور نے وفاقی وزیر ریلوے خواجہ سعد رفیق اور ان کے بھائی خواجہ سلمان رفیق کے خلاف تحقیقات کا دائرہ کار وسیع کر تے ہوئے بینک اکاؤنٹس اور ٹرانزیکشنز کی تفصیلات طلب کرلیں۔

یہ بھی پڑھیں: سعد رفیق سپریم کورٹ میں پیش

نیب نے خواجہ سعد رفیق اور خواجہ سلمان رفیق کے بینک اکاونٹس کی تفصیلات کے اسٹیٹ بینک کو مراسلہ بھجوایا ہے جس میں کہا گیا ہے کہ اسٹیٹ بینک کے ماتحت پنجاب کے تمام بینکس میں خواجہ برادران کے اکاونٹس اور ٹرانزیکشن کے حوالے سے ریکارڈ فراہم کیا جائے۔ مراسلے کے متن میں 1985 سے لے کر اب تک خواجہ برادرن کے اکاونٹس میں 5 لاکھ سے زائد ہونے والی ٹرانزیکشن کا ریکارڈ طلب کیا گیا ہے۔

ذرائع کا کہنا ہے کہ نیب نے خواجہ برادران کو بینک اکاونٹس کی تفصیلات 3 اپریل تک جمع کروانے کی ہدایت کی تھی تاہم اسٹیٹ بینک کی جانب سے تاحال تفصیلات جمع نہیں کروائی گئیں۔

نیب کا اصل کام تفتیش ھے یا تشہیر ۔؟یہ دنیا کی انوکھی تفتیش ھے جسمیں مراسلہ بعد میں ملتا ھے خبر پہلے جاری ھوتی ھے۔ کچھ ثابت نہ ھوا تو میڈیا ٹرائل کا ذمہ دار کون ہو گا ۔۔؟؟
— Khawaja Saad Rafique (@KhSaad_Rafique) April 5, 2018

دوسری جانب سعد رفیق کا ٹوئٹ میں کہنا تھا کہ نیب کا اصل کام تفتیش ہے یا تشہیر ؟ یہ دنیا کی انوکھی تفتیش ہے جس میں مراسلہ بعد میں ملتا ہے اور خبر پہلے جاری ہوتی ہے، کچھ ثابت نہ ہوا تو میڈیا ٹرائل کا ذمہ دار کون ہو گا ؟، ہمیں رُسوا کروانے والوں کو کچھ حاصل نہیں ہوگا، ایک دوسرے کی تضحیک سب کو لے ڈوبے گی ، ملکی سالمیت باہمی اتحاد اور آئین کی حکمرانی سے مشروط ہے۔