کرپٹ قیادت نے اداروں کو تباہ کر دیا سراج الحق

کرپٹ سسٹم کی وجہ سے ملک کے نوجوان اپنی ڈگریاں جلارہے ہیں، امیر جماعت اسلامی

ویب ڈیسک April 15, 2018

کرپٹ سسٹم کی وجہ سے ملک کے نوجوان اپنی ڈگریاں جلارہے ہیں، امیر جماعت اسلامی فوٹو:فائل

امیر جماعت اسلامی سراج الحق نے کہا ہے کہ کرپٹ قیادت نے اداروں کو تباہ کر دیا۔

کراچی میں میڈیا سے گفتگو کرتے ہوئے امیر جماعت اسلامی سراج الحق نے کہا کہ کرپٹ قیادت نے پی آئی اے، ریلویز اور اسٹیل ملز کو تباہ کر دیا، ملک میں 60 فیصد آبادی نوجوانوں کی ہے مگر قومی اسمبلی میں ان کی نمائندگی نہیں، جماعت اسلامی کراچی کے نوجوانوں کو مکمل حوصلہ دینے کیلئے الیکشن کرا رہی ہے۔

امیر جماعت اسلامی نے کہا کہ کراچی کچرے اور صاف پانی سمیت بے شمار مسائل کا شکارہے، کے الیکٹرک کی وجہ سے لوگ پریشان ہیں، کراچی والوں کو پانی نہیں مل رہا، شہر میں کافی عرصے سے کوئی نیا تعلیمی ادارہ نہیں بنا، میدانوں پر چائنا کٹنگ کی گئی، حکومتِ سندھ نے اب یونیورسٹیز کو بھی اپنی مٹھی میں لے لیا ہے۔

سراج الحق نے مزید کہا کہ پاکستان میں 65 فیصد نوجوان ہیں، لیکن کرپٹ سسٹم کی وجہ سے ملک کے نوجوان اپنی ڈگریاں جلارہے ہیں، ہم عام انتخابات میں 50 فیصد ٹکٹ نوجوانوں کو دیں گے، کراچی میں نوجوانوں کے الیکشن حوصلہ افزا ہیں، ان کی حوصلہ افزائی کے لیے یوتھ انٹرا پارٹی الیکشن ہو رہے ہیں۔