قلمکار کسی بھی ملک کیلیے سرمایہ ہوتا ہے، نورالہدی شاہ

کراچی: نگراں صوبائی وزیراطلاعات ونشریات نورالہدی شاہ نے کہا ہے کہ پاکستان میں ایک عرصے سے یہ روایت چلی آرہی ہے کہ ہم اپنے ادیبوں اور دانشوروں کو بھول کر دوسرے ممالک کے شاعروں، ادیبوں اور دانشوروں کو اہمیت دیتے ہیں، ان کی بات کرتے ہوئے فخرمحسوس کرتے ہیں جب کہ یہ بہت بڑی زیادتی ہے۔

کیونکہ کسی بھی ملک کا قلمکار اس کا سرمایہ ہوتا ہے، ان خیالات کااظہارانھوں نے آرٹس کونسل کراچی میں میرحامد علی کی کتاب ’ہمارے قومی رہنما‘ کی تقریب رونمائی سے خطاب کرتے ہوئے کیا۔

اس موقع پرسینٹرعبدالحسیب خان نے کہا کہ میر حامد کی کتاب سے نوجوان نسل کویہ معلوم ہو گا کہ ہمارے قومی رہنمائوں نے کتنی قربایناں دی ہیں، نگراں صوبائی وزیرسرداریاسین ملک نے کہا کہ میرحامدنے اپنی کتاب میں جوکچھ لکھا ہے سچ لکھا ہے، تقریب سے معین الدین حیدر، یحیی پولانی، احمدشاہ، فاطمہ ثریا بجیا اور دیگر نے بھی خطاب کیا جبکہ نظامت کے فرائض ڈاکٹرہمامیرنے انجام دیے۔