دنیا کی 95 فیصد آبادی آلودہ فضا میں سانس لینے پر مجبور رپورٹ

چین نے فضائی آلودگی میں کمی کے لیے اقدامات کیے پاکستان، بنگلہ دیش اور بھار ت میں آلودگی مسلسل بڑھ رہی ہے

ویب ڈیسک April 20, 2018

دنیا بھر میں فضائی آلودگی سے ہونے والی اموات (61 لاکھ) میں سے 50 فیصد اموات کے ذمہ دار صرف دو ممالک چین اور بھارت ہیں(فوٹو: فائل)

دنیا کی 95 فیصد آبادی آلودہ فضا میں سانس لینے پر مجبور ہے جب کہ ترقی پذیر ممالک کے غریب لوگ اس کے زیادہ شکار ہیں۔

اس بات کا انکشاف ہیلتھ ایفیکٹ انسٹی ٹیوٹ (ایچ ای آئی) نے اپنی ویب سائٹ پر شائع اسٹیٹ آف گلوبل ایئر رپورٹ میں کیا ہے۔ رپورٹ کے مطابق سال 2016ء میں دنیا بھر میں تقریباً 61 لاکھ افراد فضائی آلودگی کے سبب موت کا شکار ہوئے کیوں کہ فضائی آلودگی فالج، دل کے دورے، پھیپھڑوں کےسرطان اور سانس کے دیگر امراض کا باعث ہے جو بعدازاں موت کی طرف لے جاتے ہیں۔

رپورٹ میں بتایا گیا ہے کہ دنیا بھر میں بیماریوں کے باعث ہونے والی اموات میں بلند فشار خون، ناقص غذا اور سگریٹ نوشی کے بعد فضائی آلودگی چوتھی نمبر پر ہے۔

ہیلتھ ایفیکٹ انسٹی ٹیوٹ کے وائس پریذیڈنٹ باب اوکیفے نے کہا ہے کہ فضائی آلودگی دراصل دنیا بھر میں وصول کیا جانے والا ایک طرح کا بہت بڑا ٹول ٹیکس ہے جس کی وجہ سے سانس لینے میں مشکلات پیدا ہوتی ہیں نتیجے میں نوجوان سے بوڑھے تک اسپتال جاتے ہیں، بچوں کا اسکول اور لوگوں کا کام پر جانا معطل ہوجاتا ہے اور روزانہ کی اموات میں فضائی آلودگی کا بڑا کردار ہے۔

باب نے مزید کہا کہ اس رپورٹ کا مقصد دنیا کے مختلف خطوں کی اصل صورتحال کو سامنے لانا ہے کیوں کہ نظر انداز کیے گئے اس اہم چیلنج سے نمٹنے کے لیے بہت کام کرنا باقی ہے۔

رپورٹ کے مطابق آلودگی سے ہلاک ہونے والے افراد کی اکثریت ترقی پذیر اور پسماندہ ممالک میں رہنے والے کم آمدنی والے افراد کی ہے۔ دنیا بھر میں فضائی آلودگی سے ہونے والی اموات (61 لاکھ) میں سے 50 فیصد اموات کے ذمہ دار صرف دو ممالک چین اور بھارت ہیں۔ بھارت میں ہر چار میں سے ایک اور چین میں ہر پانچ میں سے ایک موت فضائی آلودگی سے پیدا شدہ بیماریوں کے باعث ہوتی ہے۔

رپورٹ میں یہ بھی کہا گیا ہے کہ چین نے فضائی آلودگی میں کمی کے لیے متعدد اقدامات کیے ہیں جب کہ پاکستان، بنگلہ دیش اور بھارت میں 2010ء کے بعد سے فضائی آلودگی میں مسلسل اضافہ ہورہا ہے۔

رپورٹ کی تیاری میں گھروں میں کھانا پکانے کے دوران ٹھوس ایندھن (لکڑی اور کوئلہ) کے استعمال اور ان سے نکلتی ہوئی حرارت سے فضا کو پہنچنے والے نقصان کو بھی شامل کیا گیا ہے جس کے نتیجے میں گھروں کے اندر کی فضا بھی آلودہ ہوجاتی ہے۔

ایسے افراد کی اکثریت کا تعلق افریقا اور ایشیا کے کم آمدنی اور متوسط طبقے سے ہے جنہیں گھروں کے اندر اور گھروں کے باہر دونوں جگہ آلودگی کا سامنا ہے۔

خیال رہے کہ لینسٹ میں شائع ہونے والی ایک اسٹڈی کے مطابق سال 2015ء میں تقریباً ہر 6 میں سے ایک موت یعنی دنیا بھر میں 90 لاکھ اموات کا تعلق کسی نہ کسی طرح فضائی آلودگی کی مختلف اقسام سے تھا ان میں ہوا، پانی، مٹی، کیمیکل یا دیگر اقسام کی آلودگیاں شامل ہیں۔