سشمیتا سین نے کرکٹر وسیم اکرم سے شادی کی خبروں کو مسترد کردیا

ممبئی: بالی ووڈ حسینہ سشمیتا سین نے  ایک بار پھر پاکستانی کرکٹر وسیم اکرم سے شادی کی خبروں  کو مسترد کردیا ہے۔

سوشل میڈیا کی ویب سائٹ پر سشمیتا سین کاکہنا ہے کہ وسیم اکرم اچھے دوست ہیں اور ہمیشہ ایک اچھے دوست ہی رہیں گے، شادی کی تمام خبریں غلط ہیں اور میڈیا کوچاہیے کہ وہ ہماری نجی زندگی میں مداخلت نہ کرے۔

 دوسری جانب وسیم اکرم نے اس خبر کی تردید کرتے ہوئے کہا تھا کہ میری اور سشمیتا دونوں کی اپنی اپنی نجی زندگی ہے اور میڈیا کو اس کا احترام رکھنا چاہیئے، انہوں نے کہا تھا کہ اس وقت ان کی تمام تر توجہ اپنے دونوں بچوں کی اچھی تربیت کرنے پر مرکوز ہے اور میرا شادی کاابھی کوئی ارادہ نہیں ہے ۔

واضح رہے کہ بھارتی میڈیا نے دعویٰ کیا تھا کہ وسیم اکرم اور سشمیتا سین اسی ماہ کے آخر میں شادی کے بندھن میں بندھ جائیں گے اور دونوں اسٹارز شادی کے بعد دبئی میں رہنے کا ارادہ رکھتے ہیں ۔

وسیم اکرم اور سشمیتا نے پہلی بار سال 2008 میں بھارتی ڈانس ریلیٹی شو ’’ایک کھلاڑی ایک حسینہ‘‘ میں ججز کے فرائض انجام دیے تھے اور تب سے ہی بھارتی میڈیا میں دونوں کی دوستی کی خبریں آنا شروع ہوگئی تھیں۔