خواجہ آصف کو شرم کرنی چاہیے اور حیا کرنی چاہیے شیریں مزاری

پہلے وزیر دفاع اور پھر وزیر خارجہ ہوتے ہوئے ایک غیر ملکی کمپنی کے مالک ہونا ہی مفادات کا تصادم تھا، شیریں مزاری

ویب ڈیسک April 26, 2018

بالآخرکار انصاف کا بول بالا ہوا اور کوڑا کرکٹ سے نجات ملی، شیریں مزاری - فوٹو: فائل

تحریک انصاف کی رہنما شیریں مزاری کا کہنا ہے کہ خواجہ آصف کو شرم کرنی چاہیے، حیا کرنی چاہیے اور قوم سے معافی مانگنی چاہیے۔

ایکسپریس نیوز کے مطابق اسلام آباد ہائی کورٹ کے جسٹس اطہر من اللہ کی سربراہی میں جسٹس عامر فاروق اور جسٹس محسن اختر کیانی پر مشتمل تین رکنی لارجر بینچ نے فیصلہ سناتے ہوئے وزیر خارجہ خواجہ آصف کو نااہل قرار دے دیا۔ جس کے بعد تحریک انصاف کے رہنماؤں کی جانب سے فیصلے کے حق میں بیانات کا سلسلہ شروع ہوگیا ہے۔

خواجہ آصف کی نااہلی سے متعلق فیصلہ آنے کے بعد اسلام آباد ہائی کورٹ کے باہر میڈیا سے بات کرتے ہوئے درخواست گزار عثمان ڈار نے کہا کہ میں اللہ تعالیٰ کا شکر گزار ہوں کہ قوم اور سیالکوٹ کے عوام کے سامنے سرخرو ہوا ہوں اور عدالتی فیصلے پر عوام اور بالخصوص پی ٹی آئی کے کارکنوں کو مبارکباد پیش کرتا ہوں۔ عدلیہ کو بھی اس زبردست فیصلے پر سلام پیش کرتا ہوں۔

عثمان ڈار نے کہا کہ یہ وہی خواجہ آصف ہیں جنہوں نے پارلیمنٹ میں میرے لیڈر عمران خان کے خلاف توہین آمیز جملے بولے، خواجہ آصف کو پہلے ہی کہہ دیا تھا کہ نہ ڈروں گا اور نہ ہی جھکوں گا، میں مقابلہ کروں گا اور یہ کرکے دکھایا۔ آج جو کامیابی حاصل کی ہے وہ پارٹی کے چیئرمین عمران خان کی مرہون منت ہے۔ اگر عمران خان نہیں ہوتے تو اس کیس کو منطقی انجام تک نہ پہنچا پاتا اور سیالکوٹ کے عوام کو 32 سال بعد گاڈ فادر سے نجات دلائی۔

Kh Asif disqualified by IHC! Justice done! Had major conflict of interest for working for a Foreign company while being first Def Min then Foreign Min! and then concealing all the relevant info! Good riddance to bad rubbish
— Shireen Mazari (@ShireenMazari1) April 26, 2018

تحریک انصاف کی رہنما شیریں مزاری نے سماجی رابطے کی ویب سائٹ ٹویٹر کا سہارا لیتے ہوئے کہا کہ پہلے وزیر دفاع اور پھر وزیر خارجہ ہوتے ہوئے ایک غیر ملکی کمپنی کا مالک ہونا ہی مفادات کا تصادم تھا، خواجہ آصف کو شرم کرنی چاہیے اور حیا کرنی چاہیے اور عوام سے معافی مانگنی چاہیے۔

Admirable persistence by Usman Dar, pursuing the case for years to see it to its logical conclusion! https://t.co/46EWJ5nXoG
— Shireen Mazari (@ShireenMazari1) April 26, 2018

شیریں مزاری کا کہنا ہے کہ پی ٹی آئی رہنماعثمان ڈار کی برسوں کی توجہ اور جدوجہد کی بدولت کیس منتقی انجام کو پہنچا، اور بالآخرکار انصاف کا بول بالا ہوا، کوڑا کرکٹ سے نجات ملی۔